Liria ka Emër, protestuesit mblidhen në Prishtinë

PRISHTINË, 1 tetor /ATSH/ Në sheshin “Skënderbeu” në Prishtinë është zhvilluar protesta e radhës me sloganin “Jo në emrin tim”, në kundërshtim të vendimit të marrë më 16 shtator nga Dhomat e Specializuara të Gjykatës së Kosovës me seli në Hagë ndaj ish-krerëve të UÇK-së.

Protestuesit kundërshtojnë vendimin dhe kanë shprehur mbështetje për ish-krerët e UÇK-së, të cilët po përballen me proces gjyqësor në Hagë.

Familjarët e Hashim Thaçit, Kadri Veselit, Jakup Krasniqit dhe Rexhep Selimit janë bërë pjesë e protestës.

Gazmend Syla nënkryetari i OVL e UÇK-së, gjatë fjalës së tij tha se dënimi i ish-krerëve është një njollë për Kosovën por edhe për ndërkombëtarët.

“Dënimi i katër krerëve të UÇK-së nga Gjykata Speciale, e cila është e gjithkujt përpos e Kosovës, është vula e turpit të drejtësisë ndërkombëtare. Dënimi i Hashim Thaçit, Kadri Veselit, Jakup Krasniqit, Rexhep Selimit, Sali Mustafës, Pjetër Shalës me 125 vjet, e çon numrin që është dënuar lufta jonë në 627 vjet”, tha ai.

Syla tha se Qeveria e Kosovës duhet të miratojë plotësim-ndryshimin e Ligjit për Dhomat e Specializuara.

“Për gjashtë vjet, ju që udhëhiqni me këtë shtet, nuk e keni kthyer kokën nga ne. Ne nuk kemi dalë në rrugë për kërkesat tona, pasi e kemi pasur vëmendjen tonë te Haga. Vetëm një herë kemi dalë kur ajo gruaja i ka thënë ‘zdravo brate’, apo na vjen votat me i largu veteranët prej pagës minimale. Sot e keni mundësinë ta lani veten. Procedo në Kuvend plotësim-ndryshimin e ligjit për Dhomat e Specializuara dhe votoni atë”, tha ai.

Protestat në mbështetje të ish-krerëve të UÇK-së dhe kundër proceseve gjyqësore në Hagë janë zhvilluar në Kosovë edhe që prej publikimit të aktgjykimit, i cili dënoi me 81 vite burg në total ish-krerët e UÇK-së.

Organizatorët kanë njoftuar gjithashtu se, pas marshit të sotëm, protestat e mbrëmjes do të rivijojnë nga nesër.

/a.f/r.e/