MOSKË – Rusia forcon marinën mes tensioneve me Perëndimin
MOSKË, 24 korrik /ATSH-DPA/- Rusia ka planifikuar të forcojë masivisht marinën e saj në sfondin e tensioneve me Perëndimin.
“SHBA-js dhe vendet e tjera të NATO-s po zgjerojnë praninë e tyre ushtarake detare në oqeanet e botës, duke përfshirë ujërat që kufizohen drejtpërdrejt me Rusinë”, tha Nikolai Patrushev, një këshilltar i ngushtë i presidentit Vladimir Putin dhe ish-shefi i shërbimeve sekrete të vendit.
“Rusia duhet të modernizojë flotën e saj – pasi rrugët tregtare po bllokohen dhe anijet e mallrave dhe pasagjerëve të vendeve të pavarura po ndalohen, kontrollohen dhe në disa raste konfiskohen nën pretekstin e luftës kundër piraterisë”, tha ai.
“Sigurimi i gatishmërisë së vazhdueshme të flotës sonë për të penguar dhe parandaluar konfliktet ushtarake – dhe për të mbrojtur vendin tonë në përputhje me normat ndërkombëtare mbetet e nevojshme,” tha Patrushev.
Putin kishte urdhëruar që dokumentet strategjike për zhvillimin e marinës të rishikoheshin dhe udhëzimet përkatëse u ishin dërguar ministrive dhe kompanive të ndërtimit të anijeve. Detajet e programit të armatimit detar nuk u zbuluan.
Rusia po përdor marinën e saj në luftën e saj kundër Ukrainës, e cila po vazhdon për më shumë se dy vjet.
Anijet nga Flota e Detit të Zi dhe flotilja në Detin Kaspik lëshojnë rregullisht raketa në qytete dhe objektiva të tjerë në Ukrainë.
Pas humbjeve të mëdha – siç është fundosja e anijes flamurtare Moskva – pjesa kryesore e Flotës së Detit të Zi është tërhequr nga baza e saj në gadishullin e Krimesë, e cila është aneksuar që nga viti 2014, në Novorossiysk në rajonin e Krasnodarit. //a.i/