MPB përshëndetë IBM-në në Bërnjak dhe Dheu i Bardhë-Konçul

Ministria e Punëve të Brendshme përshëndetë fillimin e zbatimit të Marrëveshjes për Menaxhimin e Integruar te Kufirit mes Republikës së Kosovës dhe Serbisë edhe në pikat kufitare Bërnjak dhe Dheu i Bardhë-Konçul.

“Fillimi i zbatimit të kësaj Marrëveshje synon lehtësimin e qarkullimit të qytetarëve dhe mallrave. Menaxhimi i kufijve shtetëror është në përputhje me parimet e Bashkimit Evropian dhe shënon një hap të madh në drejtim të normalizimit të marrëdhënieve mes dy shteteve”, thuhet në komunikatën për media të MPB-së.

Ministria e Punëve të Brendshme falënderon zyrtaret e Policisë së Kosovës, Doganës së Kosovës, Agjencionit të Veterinës dhe Ushqimit, për angazhimin dhe përkushtimin e treguar në përgatitjen e infrastrukturës dhe aspekteve tjera teknike për fillimin e këtij procesi.

MPB dhe Agjencionet shtetërore përgjegjëse për Menaxhimin e Integruar të Kufirit, mbeten të përkushtuara në përmbushjen e obligimeve të tyre në kuadër të dialogut teknik mes Republikës së Kosovës dhe Serbisë të ndërmjetësuar nga BE-ja./Indeksonline/