Macron bisedë telefonike me presidentin iranian: Teherani të kthehet në tryezën e bisedimeve
Presidenti francez, Emmanuel Macron ka deklaruar se ka zhvilluar një bisedë telefonike me Presidentin iranian, Masoud Pezeshkian.
Përmes një postimi në rrjetin social ‘X’, ai shkruan se mesazhi i tij ishte për një kthim në tryezën e negociatave për të adresuar çështjet balistike dhe bërthamore, dhe për rifillimin e punës së IAEA-së në Iran.
Më herët, ministri i Jashtëm iranian, Abbas Araghchi hodhi poshtë deklaratën e Presidentit të SHBA-së, Donald Trump, se vendet e tyre do të riangazhohen në negociatat bërthamore javën e ardhshme.
“Nëse interesat tona kërkojnë një kthim në negociata, ne do ta shqyrtojmë atë. Por në këtë kohë, nuk është bërë asnjë marrëveshje apo premtim, dhe është zhvilluar asnjë bisedë”, u shpreh ministri i Jashtëm i Iranit.
Araghchi theksoi se ata po negocionin kur Izraeli nisi sulmin e tij të paprovokuar më 13 qershor ndaj Iranit.
Trump urdhëroi fundjavën e kaluar goditjen e tre centraleve bërthamore iraniane me qëllim përfundimin e programit bërthamor të Iranit.
Araghchi akuzoi Trumpin se po tradhtonte përpjekjet diplomatike për të zgjidhur mosmarrëveshjet. Ndërsa Trump pretendoi se SHBA-të kishin “zhdukur” centralet kryesore bërthamore të Iranit, shefi i Agjencisë Ndërkombëtare të Energjisë Atomike (IAEA), Rafael Grossi, tha se centralet ishin dëmtuar rëndë, por sugjeroi që Irani duhet të jetë në gjendje të pasurojë uraniumin “brenda pak muajsh”.
/rtsh.al/