Makinat e perdorura deshton vjelja e takses

Të dhënat nga Ministria e Financave për 11-mujorin e vitit të kaluar tregojnë se të ardhurat nga taksa për shitjen e makinave të përdorura brenda vendit ka treguar një nivel të dobët, madje me rënie 7 për qind, krahasuar me vitin 2009.

Ministria ka publikuar një raport përmbledhës mbi situatën ekonomiko-financiare të vendit, ku bëhen të ditura me detaje të ardhurat dhe shpenzimet.

Mes shifrave mësohet se taksa e importit të makinave, e cila pësoi ndryshim me rritje, nuk ka sjellë të ardhura sa duhet për buxhetin, madje është pakësuar.

Por ministria nuk e konsideron dështim mosrealizimin e planit nga kjo taksë, duke e lidhur me faktin se detyrimi i lartë për të paguar kur shitet makina e përdorur ka shtyrë individët drejt mjeteve të reja, mbi të cilat nuk aplikohet tarifë.

Konkretisht, taksa mbi transaksionet e makinave të përdorura regjistron një nivel realizimi, si 11-mujor për 2010-n, në masën e 2 miliardë e 400 milionë lekëve, nga 2 miliardë e 600 milionë të realizuar për të njëjtën periudhë në vitin 2009. Pra, sipas Financës, kjo taksë solli rreth 200 milionë lekë më pak të ardhura, ose minus 7.2 për qind.