Maqedoni, partitë gati listat për deputetë

Partitë politike në Maqedoni deri nesër para mesnate do të duhet të dorëzojnë listat për deputetë, për shkak të skadimit të afatit përfundimtar.

Një pjesë e partive deri tani kanë mbyllur listat përfundimtare, ndërsa një pjesë tjetër po zhvillon ende kombinimet për përpilimin e tyre.

Në BDI bëjnë të ditur se kanë arritur që të rrumbullakësojnë listat me emrat e kandidatëve për deputetë në të gjitha zonat.

Në njësinë e 6 zgjedhore kandidojnë: Ali Ahmeti, Teuta Arifi, Talat Xhaferi, Behixhudin Shehapi, Xhevat Ademi etj. Në njësinë e 5 zgjedhore janë: Arben Labunishti, Vjollca Memedi, Nedim Ramizi, etj. Në njësinë numër 1 kandidojnë: Izet Mexhiti, Suzana Saliu, Rafet Muminoviq (nga boshnjakët), etj. Në njësinë numër 2: Ermira Mehmeti, Rexhail Ismaili, Hajrulla Misini, Artan Grubi, etj si dhe në njësinë 3 lista udhëhiqet nga ministri i shëndetësisë Bujar Osmani.

Edhe PDSH jozyrtarisht ka përpiluar listën për deputetë, promovimi i të cilëve do të bëhet sot në një konventë partiake. Nga PDSH në njësinë 6 janë: Menduh Thaçi, Arbër Xhaferi, Merale Ferati, Imer Aliu, Luan Tresi, etj. Në njësinë numër 5 kandidojnë: Zijadin Sela, Mendi Qyra dhe Krenar Lloga, etj. Në njësinë 1 garojnë: Mirushe Hoxha, Idriz Orana dhe Enver Sllamniku, etj si dhe në njësinë 2 janë: Valon Bela, Trim Reka dhe një kandidat nga Kumanova dhe Likova, etj.

Në RDK gjithashtu bëjnë të ditur se janë në përfundim të listave, ku jozyrtarisht njësia 6 udhëhiqet nga Rufi Osmani, njësia numër 2 nga Selver Jashari, njësia numër 5 nga Artan Dika, njësia numër 1 nga Nuhi Aliu, etj.

Në DR theksojnë se sot pritet të rrumbullakësojnë listën përfundimtare, ndërsa BDSH përfundimisht në njësinë 6 shkon me liderin e saj Bardhyl Mahmutin, të pasuar nga Daut Rexhepi-Leka dhe emra të tjerë. Në njësinë e 2 zgjedhore kjo parti garon me Xhezair Shaqiri-Hoxha të pasuar nga Ismail Rexhepi nga Kumanova. Edhe partitë e tjera politike që garojnë në këto zgjedhje janë në përfundim të hartimin të listave për deputetë.