Mbrojtja antibalistike në Evropë, nëntë shtete dhe Kievi formojnë koalicionin e ri ushtarak, Moska dënon “nxitësit e luftës”

Nëntë vende evropiane dhe Ukraina kanë shpallur zyrtarisht krijimin e një koalicioni ushtarak për zhvillimin e “aftësive raketore antibalistike” në Evropë. Vendimi u bë publik përmes një deklarate të përbashkët drejtuar udhëheqësve të pranishëm në samitin e “Koalicionit të Vullnetarëve për Ukrainën”, që po zhvillon punimet në Paris nën drejtimin e Presidentit francez Emmanuel Macron dhe në prani të Presidentit Volodymyr Zelensky.

Sipas tekstit të marrëveshjes, ky hap vjen si pasojë e “kërcënimit në rritje” nga raketat balistike dhe synon ndërtimin e një strukture “thjesht mbrojtëse” për mbrojtjen e hapësirës ajrore evropiane.

“Ne besojmë se mbrojtja e Evropës kërkon një zgjidhje gjithëpërfshirëse të arkitekturës së integruar të mbrojtjes nga raketat për të penguar dhe mposhtur kërcënimet e ardhshme nga raketat”, thuhet në deklaratën e përbashkët të nënshkruar nga Ukraina dhe nëntë vendet evropiane: Italia, Franca, Gjermania, Mbretëria e Bashkuar, Spanja, Holanda, Danimarka, Norvegjia dhe Suedia.

Kremlini: Koalicion i njerëzve të mashtruar

Formimi i këtij blloku ka sjellë reagimin e menjëhershëm të Moskës zyrtare. Zëdhënësi i Kremlinit, Dmitry Peskov, lëshoi një paralajmërim të ashpër këtë mëngjes, duke e cilësuar takimin e Parisit si një organizim që synon zgjatjen e konfliktit dhe jo arritjen e paqes.

“Do të thoja se është një koalicion nxitësish lufte. Është një grup vendesh që nuk duan paqe, që duan që lufta të vazhdojë, që e mashtrojnë veten duke menduar se mund t’i shkaktojnë një disfatë strategjike vendit tonë. Është një koalicion njerëzish të mashtruar dhe një koalicion që nxit luftën”, deklaroi Peskov, duke shtuar se Rusia po e ndjek këtë samit shumë nga afër.

Lufta kibernetike, sanksione të koordinuara nga BE dhe Londra

Paralelisht me marrëveshjen ushtarake, samiti i Parisit u shoqërua me vendime të rëndësishme në sferën e sigurisë kibernetike. Ministri i Jashtëm francez, Jean-Noël Barrot, njoftoi se Parisi do të thërrasë në ditët në vijim ambasadorin rus, pas zbulimit të një fushate të gjerë spiunazhi dhe sabotimi kibernetik të orkestruar nga shërbimi rus i sigurisë (FSB) në vendet evropiane.

Si pasojë e këtij aktiviteti, Brukseli dhe qeveria e Londrës kanë nisur një iniciativë të përbashkët sanksionesh ndaj Rusisë. Masat ndëshkuese specifikohen si më poshtë:

Subjektet e sanksionuara- Masat e koordinuara targetojnë direkt nëntë individë dhe katër subjekte juridike.

Shënjestra e inteligjencës- Ndër personat e identifikuar përfshihen oficerë të shërbimit të inteligjencës ushtarake të Moskës (GRU), si dhe kompani private të akuzuara për plane destabilizimi.

Zbulimi i Departamentit të 16-të- Autoritetet britanike dhe ato të BE-së deklarojnë se kanë zbuluar veprimtarinë e “Departamentit të 16-të të FSB-së”, i cili akuzohet për nxitjen dhe promovimin e grupeve të hakerave.

Samiti i të vullnetshmëve në prag të Festës Kombëtare Franceze

Ky samit i nivelit të lartë, ku marrin pjesë përfaqësues nga 37 vende të ndryshme, po zhvillohet në ambientet e Hôtel des Invalides, kompleksit historik ushtarak në qendër të Parisit. Takimi ka bërë bashkë rreth 25 udhëheqës shtetesh me qëllim rritjen e ndihmës ndaj Kievit, ku mes pjesëmarrësve është edhe kryeministri, Edi Rama.

Ky organizim paraprin paradën tradicionale ushtarake të 14 korrikut në Champs-Elysées për Ditën Kombëtare Franceze. Ceremonia e nesërme do të fokusohet te mbrojtja e Ukrainës dhe te “zgjimi strategjik evropian”, ku në tribunën zyrtare do të rreshtohen rreth tridhjetë krerë shtetesh, përfshirë Presidentin italian Sergio Mattarella, Friedrich Merz të Gjermanisë dhe Pedro Sanchez të Spanjës.

/rtsh.al/