Milaim Zeka: “Sa më i shkolluar, aq më besimtar”. Të nxjerrim në pah vlerat thelbësore të fesë
Analisti Milaim Zeka ka theksuar rëndësinë e nxjerrjes në pah të vlerave thelbësore të fesë, duke argumentuar se një nivel më i lartë arsimimi shoqërohet me një besim më të fortë dhe një tolerancë më të madhe. Në emisionin “Një Shqipëri” me Mentor Nazarkon, Zeka shprehu bindjen se “sa më i shkolluar të jesh, aq më shumë beson në Zot, aq më shumë je tolerant dhe respekton tjetrin.”
Zeka kritikoi qasjen sipas të cilës Zotit i luten njerëzit vetëm në momente nevoje apo krize. “Nuk duhet t’i lutemi Zotit vetëm kur ka turbulenca në aeroplan,” tha ai.
Duke sjellë në vëmendje mesazhe qendrore nga librat e shenjtë, Zeka citoi Kuranin: “Në Kuran thuhet se derdhja e padrejtë e një pike gjaku është e barasvlershme me derdhjen e gjakut të gjithë njerëzimit.” Ai ngriti pyetjen retorike: “E pse nuk i nxjerrim në pah këto vlera?”
Më tej, analisti theksoi se veprime si hakmarrja janë në fakt “hakmarrje ndaj vetes”, duke nënvizuar se gjykimi përfundimtar i përket Zotit. “Është i Madhi Zot që na gjykon, si për mirë, ashtu edhe për keq.”
Deklaratat e Zekës sugjerojnë se një kuptim më i thellë i fesë, i bazuar në edukim dhe reflektim, mund të sjellë jo vetëm një besim më të fortë individual, por edhe ndikim pozitiv në sjelljen sociale dhe promovimin e vlerave universale si toleranca dhe respekti reciprok.
/rtsh.al/