Ministri i Jashtëm izraelit: Të ndalen sulmet ndaj kurdëve në Siri

Ministri i Jashtëm izraelit Gideon Sa’ar ka kritikuar milicitë e mbështetura nga Turqia që kanë sulmuar  forcat kurde në Manbij, në veri të Sirisë.

Për këtë ngjarje, ai ka bërë thirrje komunitetit ndërkombëtar që të ndalen sulmet ndaj kurdëve.

“Sulmet ndaj kurdëve, siç pamë dje në Manbij, duhet të ndalen! Duhet të ketë një angazhim dhe veprime nga komuniteti ndërkombëtar për të mbrojtur kurdët, të cilët luftuan me guxim kundër ISIS. Ne kemi folur me administratën e SHBA-së dhe me vende të tjera për këtë çështje”, u shpreh ministri izraelit.

Thirrjet e Sa’ar për të ndihmuar kurdët u pasuan jehonë nga ish-ministrja e Drejtësisë Ayelet Shaked, e cila postoi një mesazh në 𝕏, duke thënë, “Izraeli duhet të bindë SHBA-në që të mos braktisin kurdët”.

Sa’ar tha se mbrojtja e pakicave në Siri duhet të jetë një shqetësim ndërkombëtar.

“Është e rëndësishme të sigurohet mbrojtja e pakicave në Siri: kurdëve, druzëve, të krishterëve dhe gjithashtu alavitëve. Për këtë çështje, ne do të ndjekim veprimet, jo fjalët”, tha Sa’ar.

Ministri i Jashtëm i emëruar së fundmi tha se fitorja e grupeve rebele siriane sinjalizon se “pushtimi iranian në Siri ka përfunduar”, shtoi ai.

“Assad u mbështet për një kohë të gjatë në forcat e huaja, jo në mbështetjen e popullit të tij. Prandaj, fundi i regjimit të tij nuk duhet të jetë befasues. Kontrolli iranian në Siri dhe Liban ishte artificial. Populli libanez gjithashtu meriton lirinë nga kontrolli iranian. Irani mendonte se mund të dominonte të gjithë rajonin”, vijoi ministri izraelit.

Ministri i Jashtëm iu referua edhe sulmeve të fundit izraelite në Siri, duke thënë: “Ajo që na udhëheq është siguria e shtetit të Izraelit dhe qytetarëve të tij. Prandaj, ne sulmuam sistemet strategjike të armëve, aftësitë e mbetura të armëve kimike, dhe raketat dhe raketat me rreze të gjatë veprimi – në mënyrë që ato të mos bien në duart e elementëve ekstremistë”.

/rtsh.al/