Ministri i Mbrojtjes së Suedisë: Evropa e ka kohën e kufizuar për t’u përgatitur ndaj një agresioni rus

Ministri i Mbrojtjes së Suedisë, Pal Jonson ka deklaruar se Evropa e ka kohën e kufizuar për t’u përgatitur për mundësinë e agresionit rus përgjatë krahut verior të NATO-s.

“Prandaj është jetike që të shfrytëzojmë këtë dritare mundësie që kemi, ndërsa Rusia është e zënë në Ukrainë, për të forcuar krahun verior të NATO-s,” tha Jonson.

Duke folur në kuadër të Samitit të Mbrojtjes së IISS në Pragë, ai theksoi se ushtria ruse po fiton përvojë të vlefshme në fushën e betejës në Ukrainë, veçanërisht në luftën elektronike, operacionet me dronë dhe sulmet me rreze të gjatë.

Jonson paralajmëroi se industria e zgjeruar e mbrojtjes e Presidentit rus Vladimir Putin dhe gatishmëria e tij për të marrë “rreziqe të mëdha politike dhe ushtarake” mund t’i mundësojnë Moskës të nisë një “pushtim të kufizuar” në rajonin Nordik-Baltik brenda dy deri në pesë vjet.

Paralajmërimi vjen ndërsa Rusia përgatit stërvitje të përbashkëta ushtarake të quajtura ‘Zapad’ (që do të thotë “perëndim” në rusisht) në Bjellorusi, më pak se 100 milje nga anëtarët e NATO-s, Lituania dhe Letonia.

Stërvitje të ngjashme në 2021-shin i paraprinë pushtimit në shkallë të plotë të Ukrainës nga Moska.

Ministri i Jashtëm i Italisë, Antonio Tajani, shprehu shqetësimin se paqja mes Ukrainës dhe Rusisë mbetet e largët.

“Nuk mendoj se do të ndodhë diçka konkrete para Krishtlindjeve. Përgjigjet e Putinit ishin të gjitha negative. Mjeti i pashmangshëm sot është ai i sanksioneve të reja që synojnë instrumentin financiar rus, pra pengimin e Rusisë për të pasur mjetet financiare për të furnizuar ushtrinë e saj”, tha Tajani.

Presidenti Volodymyr Zelensky, në një intervistë për “Abc News” tha se Putin u ka thënë zyrtarëve amerikanë se synon të marrë rajonin lindor të Donbasit të Ukrainës deri në fund të 2025-ës.

Rusia aneksoi ilegalisht Krimenë në 2014-ën, e ndjekur nga pjesë të Donetskut, Luhanskut, Khersonit dhe Zaporizhzhias.

Që nga kthimi në detyrë në janar, Presidenti i SHBA-së, Donald Trump, ka premtuar të shtyjë për një marrëveshje të shpejtë paqeje, por negociatat kanë ngecur pasi Moska këmbëngul për lëshime territoriale dhe refuzon armëpushimin.

/rtsh.al/