Mund të shkatërrojë objektivat me shpejtësinë e dritës, Britania teston armën lazer
Britania e Madhe ka testuar për herë të parë një rreze lazer nga një automjet ushtarak, duke shkatërruar objektiva me shpejtësinë e dritës nga më shumë se një kilometër larg.
Sipas një deklarate nga Ministria e Mbrojtjes një gjuajtje e vetme e armës lazer, e aftë për të larguar dronët nga qielli, kushton më pak se një filxhan çaj. Nëse miratohet të përdoret nga ushtria, do të bëhej një mënyrë shumë më e përballueshme për të mposhtur kërcënimet, sesa raketat dhe plumbat.
Të përshkruara nga Ministria e Mbrojtjes si “novatore”, provat mbi armën lazer u kryen në një gamë të Laboratorit të Shkencës dhe Teknologjisë së Mbrojtjes (Dstl) në Porton Down, Wiltshire.
Lazeri, i zhvilluar nga kompania amerikane e mbrojtjes Raytheon, mund të montohet në automjete të ndryshme të blinduara. Ushtarët do të fillojnë të provojnë armën futuriste më vonë gjatë vitit.
Detajet rreth provës me laser dolën në të njëjtën kohë kur Sekretari i Mbrojtjes John Healey njoftoi një partneritet prej 6.5 miliardë paund për të blerë një sërë raketash të reja, gjithnjë e më të sofistikuara gjatë dekadës së ardhshme nga kompania britaniko-franceze e mbrojtjes MBDA. Konfirmimi i planit për të rimbushur rezervat e Mbretërisë së Bashkuar erdhi pavarësisht se qeveria e re nisi një rishikim gjithëpërfshirës të mbrojtjes javën e kaluar.
Kryeministri Sir Keir Starmer, i cili ishte gjithashtu në shfaqjen ajrore, i pyetur nëse ai do të garantonte të ardhmen e këtij projekti, thjesht theksoi rëndësinë e tij./ SkyNews
/rtsh.al/