Musk shpenzoi 446 milionë dollarë për republikanët

Elon Musk ka shpenzuar afro 446 milionë dollarë për financimin e organizatave politike që mbështesin republikanët në zgjedhjet e ndërmjetme të 3 nëntorit në SHBA, duke vendosur një rekord të paprecedentë në historinë moderne politike amerikane.

Njeriu më i pasur në botë është shndërruar në financuesin më të madh të fushatës së republikanëve, me donacione që tejkalojnë edhe shumat që kishte dhënë për të mbështetur Donald Trump në zgjedhjet presidenciale të vitit 2024.

Reklamë

Sipas një investigimi të The Guardian, bazuar në të dhënat e Komisionit Federal të Zgjedhjeve në SHBA (FEC) deri më 29 tetor, drejtuesi i Tesla-s dhe SpaceX ka derdhur të paktën 445.77 milionë dollarë në komitete të veprimit politik dhe organizata të tjera që mbështesin Partinë Republikane.

Përmasat e kësaj shume bëhen më të qarta përmes disa krahasimeve të publikuara nga gazeta: me këto para, Musk mund të financonte rreth gjashtë lëshime raketash të SpaceX, të blinte mijëra automjete Tesla Cybertruck ose të porosiste më shumë se 31.9 milionë hamburgerë me djathë në Tesla Diner në Los Anxhelos.

Reklamë

Rritja e ndjeshme e financimit ka një rëndësi të veçantë, pasi Musk kishte deklaruar vitin e kaluar se synonte të kufizonte përfshirjen e tij në financimin e fushatave politike. Në zgjedhjet presidenciale të vitit 2024, ai kishte dhuruar afro 300 milionë dollarë për të mbështetur Trumpin, ndërsa ishte përfshirë aktivisht në fushatën elektorale, duke marrë pjesë në tubime krah tij.

Megjithatë, të dhënat tregojnë se Musk jo vetëm që nuk u tërhoq nga financimi politik, por e rriti ndjeshëm kontributin e tij në prag të zgjedhjeve të ndërmjetme. Vetëm gjatë dy muajve të fundit të fushatës, donacionet e tij u rritën me rreth 200 milionë dollarë.

Pavarësisht se ai është shfaqur më rrallë në aktivitetet elektorale krahasuar me vitin 2024, mbështetja e tij financiare për republikanët ka arritur nivele të paprecedenta.

Ku shkojnë 446 milionë dollarët?

Pjesa më e madhe e financimit drejtohet te organizatat e njohura si Super PACs, komitete të veprimit politik që mund të mbledhin dhe shpenzojnë shuma të pakufizuara parash për të mbështetur ose kundërshtuar kandidatë, pa koordinuar drejtpërdrejt shpenzimet e tyre me fushatat zyrtare elektorale.

Kontributi më i madh individual i Musk, në vlerën e 216 milionë dollarëve, shkoi për America PAC, organizatën politike që ai vetë ka krijuar. Ky komitet e ka përqendruar aktivitetin e tij në 43 gara zgjedhore për Dhomën e Përfaqësuesve dhe Senatin, duke përdorur reklama televizive, fushata dixhitale, mesazhe telefonike dhe materiale elektorale të dërguara me postë.

Sipas të dhënave të publikuara nga The Guardian, America PAC ka kryer 839 shpenzime të pavarura elektorale në garat për Dhomën e Përfaqësuesve dhe 623 në garat për Senatin, në gjithsej 17 shtete.

Shpërndarja e parave nuk është e njëtrajtshme, pasi vëmendje më e madhe u kushtohet shteteve ku garat elektorale konsiderohen veçanërisht të ngushta, si Michigan dhe Arizona.

Vëmendje të veçantë paraqet aktiviteti i America PAC në Teksas, ku po zhvillohet një nga garat më të rëndësishme për Senatin. Republikani Ken Paxton përballet me demokratin James Talarico në një garë që është shndërruar në më të kushtueshmen e zgjedhjeve të ndërmjetme të këtij viti.

Organizata e Musk ka shpenzuar më shumë se 33 milionë dollarë për aktivitete që synojnë zgjedhjen e Paxton.

Paralelisht, miliarderi ka kontribuar me 168 milionë dollarë në Senate Leadership Fund, një tjetër komitet i fuqishëm politik që mbështet kandidatët republikanë për Senat, përfshirë edhe Paxton.

Një pjesë e konsiderueshme e financimit është drejtuar drejt fushatave negative kundër Talarico-s.

America PAC ka shpenzuar 28 milionë dollarë për materiale elektorale kundër kandidatit demokrat, me mesazhe që e akuzojnë atë, ndër të tjera, për mbështetjen e politikave ekstreme të së majtës ose që përqendrohen te qëndrimet e tij për të drejtat e personave transgjinorë.

Vetëm gjatë muajit tetor, sipas investigimit, janë shpenzuar nga 300 mijë deri në 350 mijë dollarë për një reklamë në Google kundër Talarico-s, e cila është shfaqur më shumë se 10 milionë herë brenda tetë ditësh.

Ndikimi i Musk në fushatën elektorale nuk kufizohet vetëm te kontributet financiare.

Pronari i platformës X shfrytëzon edhe rrjetin social, ku ka më shumë se 200 milionë ndjekës, për të rritur ekspozimin e mesazheve të America PAC. Në disa raste, ai ripublikon reklama elektorale ose sulmon personalisht kandidatët demokratë.

Në tetor, për shembull, ai ripublikoi një reklamë kundër Talarico-s, duke e akuzuar atë se dëshiron të promovojë ndryshimin e gjinisë te fëmijët dhe të shkatërrojë sigurinë e kufijve amerikanë.

Kjo praktikë i mundëson Musk të ndërthurë fuqinë e tij financiare me mundësinë e komunikimit të drejtpërdrejtë me një audiencë të jashtëzakonshme në internet.

Kaloi edhe donatorët më të mëdhenj të Silicon Valley

Shuma prej 445.77 milionë dollarësh e rendit Musk si financuesin më të madh të këtij cikli zgjedhor, duke lënë pas miliarderë të tjerë që kanë një rol të rëndësishëm në financimin e politikës amerikane, si George Soros dhe Michael Bloomberg.

Sipas The Guardian, donacionet e këtij viti tejkalojnë edhe shumën totale që kishin dhuruar së bashku financuesit më të mëdhenj të Silicon Valley, përfshirë vetë Musk, gjatë garës presidenciale të vitit 2024.

Ky krahasim nxjerr në pah përqendrimin e një ndikimi të jashtëzakonshëm financiar në duart e një personi të vetëm, në një proces zgjedhor që do të përcaktojë kontrollin e Kongresit amerikan për dy vitet e ardhshme.

Rezultati i 3 nëntorit do të përcaktojë nëse republikanët do të ruajnë shumicën në Dhomën e Përfaqësuesve dhe në Senat, apo nëse demokratët do të arrijnë të rimarrin kontrollin e njërit ose të të dyja dhomave legjislative.

Përtej mbështetjes politike për Donald Trump, rezultati i zgjedhjeve ka një rëndësi të veçantë edhe për interesat e biznesit të Musk, pasi ai është lidhur ngushtë me administratën Trump, ndërsa kompanitë e tij operojnë në sektorë që ndikohen drejtpërdrejt nga politikat federale, si inteligjenca artificiale, industria automobilistike, hapësira dhe mbrojtja.

SpaceX ka siguruar kontrata të rëndësishme qeveritare gjatë vitit 2026, ndër të tjera në kuadër të programit të mbrojtjes kundër raketave të Trump. Paralelisht, Pentagoni përdor Grok, sistemin e inteligjencës artificiale të zhvilluar nga kompania xAI e Musk.

Megjithatë, pavarësisht përmasave mbresëlënëse të donacioneve politike, kjo shumë përfaqëson një pjesë jashtëzakonisht të vogël të pasurisë së përgjithshme të Musk, pasi pasuria e tij neto vlerësohet në rreth 924 miliardë dollarë.

Kjo do të thotë se afro 446 milionë dollarët që ai ka investuar në zgjedhjet e ndërmjetme përfaqësojnë më pak se 0.05% të pasurisë së tij…