Ndërtim pa leje në Rrugën e Dibrës, sekuestrohet sipërfaqja shtesë

Inspektorati i Mbrojtjes së Territorit, në bashkëpunim me Policia e Shtetit, ka ndërhyrë në një objekt në rrugën “Llukë Kaçaj”, rruga e Dibrës, në Njësinë Administrative nr. 4 në Tiranë, pas dyshimeve për shkelje të lejes së ndërtimit. Objekti prej 9 katesh ndërtohet nga Mirson 2A shpk.

Sipas autoriteteve, gjatë kontrollit në terren, për të cilin është mbajtur akt-konstatimi nr. 8827, datë 7 maj 2026, janë konstatuar rreth 2550 metra katrorë shtesë të ndërtuara në kundërshtim me lejen e miratuar. Po ashtu, është evidentuar edhe përdorimi i objektit pa certifikatë përdorimi.

Nga verifikimet rezulton se tejkalimi i sipërfaqes ndërtimore është mbi 20% të totalit të miratuar, duke kaluar kufirin e parashikuar nga Akti Normativ nr. 8, datë 1 tetor 2025.

Në këto kushte, bazuar në parashikimet ligjore në fuqi, autoritetet bëjnë me dije se objekti do t’i nënshtrohet masës së konfiskimit për interes publik.a.b