Negociatat e anëtarësimit në BE/ Jaupaj: 10 miliardë euro investime për çështje medisore para integrimit
Rreth 10 miliardë euro do ti kushtojë Shqipërisë mjedisi, si një ndër kapitujt më të vështirë për tu anëtarësuar në Bashkimin Europian.
“Për të gjitha aspektet e investimeve që biznesi dhe shteti duhet të realizojnë në vitet në vijim, vlera e nevojshme arrin në rreth 9.8 miliardë euro. Një shifër e tillë është e lartë, por përfshin çështje mjedisore, nga ujërat e ndotura, emisionet industriale të prodhuesve më të mëdhenj, deri te direktivat për restaurimin e natyrës. Këto investime janë pjesë e një periudhe afatgjatë, duke pasur parasysh që edhe disa vende anëtare të BE-së nuk janë ende plotësisht të harmonizuara me standardet e BE-së.”
Ministri i Mjedisit tha se nuk do të ketë kosto shtesë për bizneset ndersa nënvizoi se është kërkuar një periudhë e ndërmjetme që sektori privat të përshtatet me standartet e reja mjedisore.
“Dua të siguroj bizneset që gjatë negociatave kemi insistuar që të sigurohen periudha tranzitore të mjaftueshme për sektorin privat. Kjo do të bëjë që bizneset të kenë kohën e nevojshmepër të përshtatur teknologjitë dhe për të mos u penalizuar me anëtarësimin e Shqipërisë në Bashkimin Europian. Dy vitet e ardhshme janë vite politikbërje dhe pune intensive në hartimin e legjislacionit.”
Nje vit nga sekuestrimi 2800 ton mbetjeve të rrezikshme që u kthyen nga Tajlanda, ministri Jaupajt, tha se dy janë rrugët që pritet të ndiqen për asgjesimin e tyre.
“Ose do të ketë eksport për t’u asgjësuar në vendet e huaja, ose nëse vendoset që këto mbetje do të asgjësohen këtu, do të japim mbështetje me subjektet private në Shqipëri që kanë kapacitete dhe mundësi për asgjësimin e tyre. Për shkak të ndjeshmërisë, i gjithë procesi do të jetë transparent.”
Me reformën e re të menaxhimit të mbetjeve, Shqipëria është e ndarë në 10 zona, ku për secilën janë hartuar plane të detajuar investimesh, te cilat do të nisin gradualisht nga viti 2026 dhe do të vijojnë në vitet në vazhdim./abcnews.al