Nënkryetari i Bashkisë Pogradec: Infrastrukturë dhe pastërti për një sezon turistik cilësor, ofertat akomoduese kanë ardhur në rritje

Zv.kryetari i Bashkisë së Pogradec, Paskalino Ziko, deklaroi se çelja e sezonit turistik përbën një nga fazat më të rëndësishme të vitit për qytetin, duke theksuar angazhimin e institucionit për të garantuar një sezon të suksesshëm.

Sipas tij, një ndër prioritetet kryesore mbetet pastrimi dhe mirëmbajtja e bregut të Liqeni i Ohrit, por edhe e gjithë territorit urban, me synim krijimin e një imazhi pozitiv për vizitorët.

“Pastrimi kryhet gjatë gjithë vitit në mënyrë periodike. Përveç punës së përditshme nga kompania e pastrimit, organizohen edhe aksione të posaçme përgjatë bregut të liqenit dhe akseve rrugore drejt Qafë Thanë dhe Qafë Plloçë”, u shpreh Ziko, duke shtuar se aksione të tjera do të vijojnë edhe në ditët në vazhdim.

Ai bëri të ditur në “Mirëmëngjes Shqipëri” se, përveç pastrimit, bashkia po punon për sistemimin e infrastrukturës urbane, përfshirë vijëzimin e rrugëve, sinjalistikën dhe ndriçimin, në mënyrë që turistët të gjejnë një qytet të pastër dhe të mirëorganizuar.

Duke folur për ndotjen e liqenit, Ziko theksoi se Pogradeci aktualisht nuk përballet me derdhje të ujërave të zeza, pasi i gjithë bregu është i pajisur me rrjet kanalizimesh.

Megjithatë, ai pranoi se disa përrenj që derdhen në liqen mbeten burime potenciale ndotjeje. Sipas tij, bashkia ndërhyn periodikisht për pastrimin e tyre, për të parandaluar transportimin e mbetjeve drejt liqenit.

Një tjetër sfidë natyrore mbeten algat, për të cilat ndërmarrja e gjelbërimit kryen pastrim të përditshëm.

Sa i përket menaxhimit të mbetjeve plastike, Ziko bëri të ditur se ato transportohen për përpunim në Landfilli i Maliqit.

/rtsh.al/