Nis seanca plenare në Kuvend për vlerësimin e institucioneve të pavarura, opozita bojkoton

Ka nisur punimet seanca plenare në Kuvendin e Shqipërisë, me një rend dite të përqendruar te shqyrtimi i veprimtarisë së institucioneve kushtetuese dhe atyre të pavarura për vitin 2025.

Ndërkohë ashtu siç ishte paralajmëruar, opozita ka bojkotuar seancën dhe nuk është në sallë.

Projektrezolutat e institucioneve kryesore në rend dite

Axhenda e punimeve parlamentare përfshin shqyrtimin dhe votimin e një serie projektrezolutash që analizojnë performancën institucionale gjatë vitit të kaluar. Sipas dokumentit zyrtar të rendit të ditës, vëmendja kryesore do të përqyrohet në disa sektorë kyç:

• Sektori elektoral dhe rregullator: Projektrezolutat për vlerësimin e punës së Komisionit Qendror të Zgjedhjeve dhe Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI).
• Sektori financiar dhe statistikor: Analiza e veprimtarisë së Bankës së Shqipërisë, Autoritetit të Mbikëqyrjes Financiare (AMF) dhe Institutit të Statistikave (INSTAT).
• Komunikimi dhe Energjetika: Shqyrtimi i raporteve për AKEP, RTSH, AMA, si dhe dy enteve rregullatore, atij të Energjisë (ERE) dhe të Ujit (ERRU).

Përpara kalimit te pikat përmbajtësore, seanca parashikon miratimin administrativ të procesverbaleve të seancave plenare të datave 30.6.2026 dhe 2.7.2026, në përputhje me Nenin 44 të Rregullores së Kuvendit.

Diskutimet për çështjet e qytetarëve

Pjesa përmbyllëse e kësaj seance plenare është projektuar për t’iu dedikuar drejtpërdrejt problematikave të ngritura nga baza e votuesve nëpër zona të ndryshme të vendit.

“Në fund të seancës janë parashikuar edhe diskutime për çështje të evidentuara nga zgjedhësit, ku deputetët pritet të trajtojnë problematika të ngritura nga qytetarët në zonat e tyre”, thuhet në përcaktimet e rendit të ditës.

Rrëzohet kërkesa e deputetit Erald Kapri për interpelancë me ministrin e Brendshëm, Besfort Lamallari

Kryetari i Kuvendit, Niko Peleshi, ka rrëzuar kërkesën për interpelancë të deputetit të opozitës, Erald Kapri, e cila ishte drejtuar ministrit të Brendshëm, Besfort Lamallari, lidhur me ngjarjet e ndodhura në Rrjoll dhe në Zvërnec. Sipas drejtuesit të seancës, refuzimi lidhet me faktin se tematika në fjalë është ezauruar tashmë në debatet parlamentare.

“Kjo çështje ka qenë pjesë e rendit të ditës në seancat e kaluara po me ministrin Lamallari dhe nuk përbën më objekt diskutimi”, u shpreh Kryetari i Kuvendit, Niko Peleshi, duke argumentuar vendimin.

Pas vendimit për rrëzimin e kërkesës, deputeti Erald Kapri ka reaguar nga foltorja e Kuvendit, duke e cilësuar masën si një përpjekje për të kufizuar të drejtën e fjalës së përfaqësuesve të opozitës dhe duke ngritur akuza ndaj drejtuesve të Policisë së Shtetit dhe dikasterit të Brendshëm.

“Si mund të ndaloni një deputet të flasë për çështje që është votuar. Nuk është parlament ky. S’mund të pyesim ne ministrin e Brendshëm, pse, se e paskemi pyetur në seancë të kaluar”, deklaroi Kapri gjatë fjalës së tij.

Deputeti ngriti gjithashtu pretendime specifike lidhur me masat e sigurisë rreth institucionit dhe menaxhimin e rendit publik:

Kapri deklaroi se “është rrethuar parlamenti me blinda” dhe shtoi se kjo vjen si pasojë e frikës nga protestat me vezë.

Ai akuzoi ministrin Lamallari se “e kalon kohën duke sulmuar njerëz që merren me protestën, e nuk merret me policinë e shtetit që ka dalë nga shinat”.

Në lidhje me interpelancën e kërkuar, Kapri vuri në dyshim efikasitetin e masave administrative të ndërmarra nga Ministria e Brendshme ndaj subjekteve private të sigurisë.

“Kur ndodhi dhuna në Zvërnec nga bodygardët e oligarkut, disa ditë ministri tha se ia hoqëm licencat. Ka raportime serioze se këto kompani thjeshtë kanë ndërruar emrin”, pretendoi deputeti i opozitës.

Në mbyllje të fjalës së tij, duke iu referuar situatës në Rrjoll, Kapri shtoi se kishte pasur përpjekje për censurë dhe kritikoi reagimet e kryeministrit ndaj të rinjve.

Debat në Kuvend mes deputetëve Redi Muçi dhe Taulant Balla për protestat dhe legjitimitetin parlamentar

Në seancën plenare ka pasur replika mes deputetit Redi Muçi dhe kryetarit të grupit parlamentar të PS-së, Taulant Balla. Përplasja e tyre u përqendrua te legjitimiteti për të folur në emër të qytetarëve, menaxhimi i protestave dhe qëndrimet e mbajtura në rrjetet sociale lidhur me pjesëmarrjen në to.

Muçi: Nuk nënshkruhet asnjë rezolutë pa kërkesat e protestuesve

Gjatë fjalës së tij, deputeti Redi Muçi ka bërë të qartë pozicionin e tij lidhur me përfaqësimin e kërkesave të protestuesve në nivele ndërkombëtare, duke u ndalur specifikisht te procesi në Strasburg.

“Në Strasburg s’mund të nënshkruhet asnjë rezolutë e përbashkët që nuk merr në konsideratë kërkesat e protestuesve”, nënvizoi Muçi.

Më tej, ai i është drejtuar drejtpërdrejt Taulant Ballës, duke e akuzuar atë për ironizim të tubimeve përmes publikimit të imazheve në rrjete sociale:

“Një thirrje të fundit ia drejtoj Taulantit që çdo ditë merr fotot e orës 7 nga protesta dhe tallet me protestuesit. Kujdes se përballë nuk ke Saliun, por rininë shqiptare. Vazhdo me syleshtësinë tënde”, deklaroi Muçi, duke e mbyllur fjalën me një citat të shkrimtarit Viktor Hygo për raportin mes popullit dhe pushtetit.

Balla: Transparencë për përçarjen e protestës nga opozita

Në përgjigjen e tij, deputeti Taulant Balla ka hedhur poshtë pretendimet për tallje, duke argumentuar se publikimet e tij përbëjnë transparencë mbi ecurinë e tubimeve. Ai ka vënë në dyshim legjitimitetin përfaqësues të Muçit, duke u ndalur te mënyra e marrjes së mandatit.

“E para, ti ske asnjë të drejtë, as politike, as morale të flasësh në emër të popullit sepse të paktën në këtë sallë në emër të popullit ka një shumicë të caktuar nga vota e një viti më parë, ndërsa ti je thjesht dhe vetëm aksidentalisht pasi ke ardhur për shkak të dorëheqjes së një deputeti tjetër, ke ardhur hajdutshe”, deklaroi Balla.

Lidhur me situatën në protestë, Balla përdori një metaforë për të ilustruar largimin e qytetarëve pas përfshirjes së figurave politike. Sipas Ballës, statuset e tij tregojnë “sesi kur hyri Saliu, Gonia, Qorri apo ndonjë tjetër, flamingot fluturuan dhe ngelën sorra si puna jote”.

Gjatë replikës, Balla adresoi edhe një thirrje ndaj deputetit të opozitës Agron Shehu, duke kërkuar sqarime se “si mund të shesë një njeri një apartament 151 m2 për 15 mln euro”.

Balla e mbylli reagimin e tij duke deklaruar se “flamingot janë zog shumë i pastër dhe nuk rri me llumin”, duke ripërsëritur se largimi i pjesëmarrësve erdhi si pasojë e përfshirjes së elementeve që ai i cilësoi si negative.

Deputeti Pirro Vengu prezanton rekomandimet për KQZ-në, kërkohet sistem i ri elektronik për financat e partive

Gjatë seancës plenare në Kuvendin e Shqipërisë, deputeti Pirro Vengu ka prezantuar zyrtarisht rekomandimet e legjislativit drejtuar Komisionit Qendror të Zgjedhjeve (KQZ). Propozimet synojnë reformimin e strukturave të brendshme të institucionit zgjedhor dhe rritjen e kontrollit mbi aspektet financiare dhe teknologjike.

Sipas Vengut, forcimi i këtyre mekanizmave është i domosdoshëm për të garantuar integritetin e proceseve elektorale përballë opinionit publik.

“Vlen ta bisedojmë sot për zgjedhjet për të krijuar atë besimin e qytetarëve që shpesh cenohet”, u shpreh deputeti gjatë fjalës së tij në tribunë.

Katër drejtimet kryesore të rekomanduara nga Kuvendi

Në kuadër të projektrezolutës për vlerësimin e veprimtarisë së institucionit menaxhues të zgjedhjeve, Kuvendi ka specifikuar detyrat prioritare ku KQZ-ja duhet të përqendrojë punën e saj tek rritja e nivelit të bashkëpunimit me strukturat përkatëse përgjegjëse të Kuvendit; përfshirja e plotë e teknologjisë së informacionit si një fushë prioritare brenda Planit Strategjik pesëvjeçar 2026-2031; forcimi i kontrollit efektiv mbi financimet e fushatave zgjedhore, duke përditësuar sistemin elektronik financiar; hartimi dhe paraqitja e një raporti të veçantë dhe të detajuar për Kuvendin sa i përket auditimit të financave të partive politike dhe fushatave.

Në mbyllje të prezantimit të këtyre pikave, deputeti Pirro Vengu nënvizoi rëndësinë e të dhënave të hapura për publikun, duke deklaruar se “sa më shumë informacion ka për mënyrën si votohet dhe numërohen votat, aq më pak teori konspirative ka”.

Gjiknuri: Qeveria e gatshme të financojë mbi 50 mln euro për votimin elektronik

Gjatë shqyrtimit të raportit të veprimtarisë së Komisionit Qendror të Zgjedhjeve për vitin 2025, deputeti i shumicës parlamentare, Damian Gjiknuri, ka konfirmuar gatishmërinë e ekzekutivit për të implementuar votimin elektronik në rang kombëtar, duke kushtëzuar realizimin e tij me arritjen e një konsensusi me opozitën.

Paralelisht, Gjiknuri njoftoi se procesi i dialogut politik për ndryshimet në ligjin elektoral ka hasur në ngadalësim, çka do të diktojë zgjatjen e afateve të strukturave përgjegjëse.

“Qeveria ka shprehur gatishmërinë për të financuar me një vlerë financiare mbi 50 mln euro për ta bërë në Shqipëri votimin në mënyrë elektronike. Nëse ka vullnet, ne mund ta realizojmë për zgjedhjet e përgjithshme”, deklaroi Gjiknuri nga foltorja e Kuvendit.

Sipas deputetit, ndonëse Komisioni i Reformës Zgjedhore ka avancuar në disa drejtime teknike, ngritja e urave të komunikimit mes palëve ka qenë sfida kryesore gjatë kësaj periudhe. Për këtë arsye, zyrtarisht pritet të kërkohet më shumë kohë për të përmbyllur draftet ligjore.

Nga të dhënat e paraqitura në fjalën e tij, gjendja e procesit administrativ dhe politik paraqitet si më poshtë: Komisioni i reformës zgjedhore pritet të kërkojë zyrtarisht shtyrjen e afatit të tij gjatë seancës pasardhëse plenare; vështirësi të evidentuara në komunikimin politik mes palëve negociuese; adresimi dhe specifikimi i çështjeve të mbetura pezull brenda ligjit për financimin e partive politike dhe rregullave për kodin zgjedhor.

“Komisioni i reformës zgjedhore, besoj në seancën tjetër do të kërkojë edhe shtyrjen e afatit, ka kryer një punë relativisht të mirë, por ka pasur vështirësi në komunikimin politik. Ta shtyjmë edhe për disa muaj që të adresojmë edhe këto pak gjëra të mbetura”, specifikoi Gjiknuri lidhur me kohëzgjatjen e kërkuar për arritjen e marrëveshjes ligjore.

Deputetja Klodiana Spahiu dënon ‘review’-të negative ndaj bizneseve, akuzon partitë e vogla të opozitës

Gjatë fjalës së saj në seancën plenare të Kuvendit, deputetja e shumicës parlamentare, Klodiana Spahiu, është ndalur te një fenomen i regjistruar gjatë ditëve të fundit, që lidhet me fushatën e vlerësimeve (review-ve) negative në rrjetet sociale ndaj bizneseve vendase.

Sipas deputetes, kjo formë reagimi dëmton drejtpërdrejt ekonominë familjare dhe sektorin e turizmit, ndërsa ka pretenduar se pas këtyre veprimeve qëndrojnë organizime politike.

“Fenomeni që u vu re në ditët e fundit ishte shumë i rëndë, shumë i vështirë për t’u pranuar, por është bërë nën dirigjimin e disa prej opozitave të vogla të Shqipërisë”, deklaroi Spahiu nga foltorja e Kuvendit.

Në argumentimin e saj, deputetja nënvizoi se veprimet që prekin imazhin e vendit dhe ecurinë e sektorit turistik bien ndesh me përpjekjet e përgjithshme për afrimin e vendit me standardet evropiane. Ajo i kërkoi spektrit opozitar të mos ndërmarrë hapa që pengojnë këtë proces.

Spahiu i bëri thirrje opozitës të mos punojë kundër qëllimit të përbashkët të shqiptarëve për anëtarësimin në Bashkimin Evropian. Ajo theksoi se nga pjesa më e madhe e mazhorancës po bëhet “sakrifica maksimale që të arrijmë objektivin e kërkuar”.

Deputetja tërhoqi vëmendjen se goditja ndaj këtij sektori ka pasoja zinxhir për qytetarët.

“Kur humbet turizmi, humbet çdo familje e nderuar dhe e respektuar shqiptare që punon me djersën e ballit”, nënvizoi në mbyllje të fjalës së saj deputetja Klodiana Spahiu.

/rtsh.al/