OKB/ Ministri i Jashtëm i Ukrainës, Kuleba: Të mos përsëriten gabimet e së kaluarës

Ministri i Jashtëm i Ukrainës, Dmytro Kuleba, duke folur në Asamblenë e Përgjithshme të Kombeve të Bashkuara, ka bërë thirrje se duhet të veprohet shpejt, në mënyrë konkrete dhe të vendosur.

Ai e cilësoi këtë pikë të krizës si kritike për historinë botërore, dhe se veprimet në vijim do të përcaktojnë dekadat e ardhshme.

Kuleba tha se: “Të gjithë kemi lexuar për gabimet që kanë bërë politikanët në prag të luftërave të tjera botërore”, ndërsa i kërkoi vendeve të mos i përsëriten ato.

Akuza e Rusisë se Ukraina ka përshkallëzuar situatën është absurde, thotë Kuleba.

“Deklaratat e Rusisë janë skandaloze dhe të tmerrshme dhe shkojnë përtej kërcënimit të Ukrainës”.

Ai tregon fjalimin e Vladimir Putin në fillim të kësaj jave, kur tha se Ukraina nuk ka të drejtë të ekzistojë.

“Kushdo që mendon se e ekzagjeroj, duhet ta shikojë këtë fjalim të tmerrshëm”, shtoi ai.