PD: Rama kërkon të bllokojë për herë të tretë statusin
Partia Demokratike ka akuzuar sërish kreun e PS-së Edi Rama se kërkon të bllokojë statusin e vendit kandidat për të tretën herë.
Zëdhënësja e PD-së Silvi Bardhi theksoi se kryesocialisti Rama ka vendosur të rikthehet përsëri në traditën e tij disa vjeçare destruktive të bllokimit të votimit në Parlament të reformave që kërkojnë miratimin me tre të pestat e votave.
“Me qëndrimin që ai po mban ndaj votimit të ligjeve për reformën e pushtetit gjyqësor, dëshmon qartë se ai përpiqet dhe shpreson se do të bllokojë për të tretën herë statusin e vendit kandidat për Shqipërinë. Me sa duket zoti Rama vazhdon të besojë verbërisht se me bllokimin e tij të rradhës do të mund kështu të fajësojë e të bëjë përgjegjëse qeverinë e cila po bën gjithçka për plotësimin e kërkesave të Brukselit për marrjen e statusit” theksoi zëdhënësja.
Zëdhënësja e PD-së gjithashtu ka shtuar se Rama për qëllime tërësisht personale dhe kryekeput në funksion të karriges së pushtetit do me çdo kusht të bllokojë ngritjen e Kolegjit Administrativ në Gjykatën e Lartë, ngritjen e të cilit e propozuan vetë deputetët e Partisë Socialiste në Komisionin e Ligjeve.
“Partia Demokratike denoncon këto qëndrime destruktive dhe bllokuese të z.Rama si një përpjekje absurde dhe e dëshpëruar për të afruar ardhjen e tij në pushtet nëpërmjet bllokimit të reformave që kërkohen për integrimin e Shqipërisë në Bashkimin Europian dhe shkelmimit të interesave europiane të qytetarëve shqiptarë” tha Bardhi.
Gjithashtu, PD-ja i ka bërë thirrje kryetarit të Partisë Socialiste të heqë dorë nga politika e bllokimit të reformave të drejtësisë, ngritjes së Kolegjit Administrativ dhe Gjykatës Administrative të cilat sipas saj janë jetike dhe të domosdoshme për bizneset dhe qytetarët shqiptarë, zgjidhjen e problemeve të tyre të shumta me Administratën shtetërore dhe mbrojtjen e tyre nga arbitrariteti i kësaj të fundit.
“Partia Demokratike i rikujton z.Rama se mbështetja e reformave për integrimin e vendit është detyrim kushtetues, statutor dhe programor për Partinë Demokratike dhe Partinë Socialiste si dhe të gjitha forcat politike të harkut kushtetues të vendit” shtoi zëdhënësja.