POLONI – Parlamenti miraton lehtësimin e ligjeve të rrepta për abortin
VARSHAVË, 21 tetor /ATSH-PAP/- Parlamenti i Polonisë miratoi me shumicë të ngushtë dy projektligje që synojnë lehtësimin e ligjeve të rrepta për abortin në vend.
Megjithatë, presidenti konservator Karol Nawrocki pritet të mos i miratojë ato.
Projektligji i parë, i paraqitur nga aleanca e qendrës së kryeministrit Donald Tusk, parashikon ndryshimin e Kodit Penal për të hequr pjesërisht dënimin penal për kryerjen e abortit dhe për personat që ndihmojnë në kryerjen e tij.
Projektligji u miratua dje në mbrëmje me 217 vota pro dhe 213 kundër.
Mes deputetëve që votuan kundër ishte edhe zëvendëskryeministri dhe ministri i Mbrojtjes, Władysław Kosiniak-Kamysz, nga Partia Popullore Polake (PSL), një forcë politike me prirje agrare, të krishtera dhe konservatore.
Projektligji i dytë parashikon lejimin e abortit në rastet kur fëmija i palindur ka probleme të rënda të zhvillimit të trupit.
Kjo do të përmbyste një vendim të debatueshëm të Gjykatës Kushtetuese të vitit 2020.
Ky projektligj u miratua me 233 vota pro, ndërsa 203 deputetë votuan kundër.
Vendimi i vitit 2020 ndaloi abortin edhe në rastet kur fetusi kishte keqformime të rënda. Që prej asaj kohe, aborti në Poloni lejohet vetëm kur shtatzënia është pasojë e përdhunimit ose incestit, apo kur jeta e gruas shtatzënë është në rrezik.
Vendimi shkaktoi protesta masive që zgjatën për muaj të tërë dhe e la Poloninë me një nga legjislacionet më të rrepta për abortin në Evropë.
Lehtësimi i këtyre kufizimeve ishte një nga premtimet kryesore të kryeministrit Donald Tusk gjatë fushatës zgjedhore. Koalicioni i tij proevropian qeveris vendin që prej vitit 2023.
Megjithatë, mundësitë që projektligjet të hyjnë në fuqi janë të pakta.
Presidenti Karol Nawrocki, i mbështetur nga partia nacionaliste Ligj dhe Drejtësi (PiS), pritet të vendosë veton ndaj të dy projektligjeve, duke penguar hyrjen e tyre në fuqi.
Zyra e presidentit deklaroi se ai do ta shqyrtojë legjislacionin në mënyrë objektive dhe thelbësore, duke iu referuar qëndrimeve të tij të mëparshme për mbrojtjen e jetës së palindur. //a.i/