“Paketa e Maleve”, qeveria shpall në Kukës tre zona me përparësi për zhvillimin e ekonomisë malore

Këshilli i Ministrave miratoi një vendim me rëndësi për zhvillimin e veriut të vendit, duke shpallur zyrtarisht tri zona në territorin e Bashkisë Kukës si “zona me përparësi zhvillimin e ekonomisë malore”. Ky vendim bazohet në ligjin e njohur si “Paketa e Maleve”, dhe synon të nxisë investimet në këto rajone.

Në total, vendimi prek një sipërfaqe prej rreth 900 hektarë (rreth 907.29 ha), e ndarë në tri zona specifike brenda Bashkisë Kukës:

Zona Nr. 1 (Njësia Bicaj): 253.55 hektarë.

Zona Nr. 2 (Njësia Bicaj): 398.18 hektarë.

Zona Nr. 3 (Njësia Arren): 255.56 hektarë.

Kufijtë dhe shtrirja e saktë e këtyre zonave janë përcaktuar në hartën treguese në sistemin KRGJSH, duke formalizuar zonat ku do të aplikohen lehtësitë e parashikuara nga “Paketa e Maleve”.

Qeveria ka përcaktuar qartë se cilat janë llojet e aktiviteteve që do të zhvillohen me përparësi në këto zona. Ky fokus i trefishtë synon një rritje ekonomike të diversifikuar:

Zhvillimi Ekonomik

Zhvillimi Industrial

Zhvillimi Turistik

Ky kombinim tregon synimin për të shfrytëzuar potencialin natyror, por edhe për të krijuar vende pune përmes ndërtimit të kapaciteteve industriale të përshtatshme për zonat malore.

Për zbatimin e këtij vendimi dhe për shfrytëzimin e ligjit “Për paketën e maleve”, janë ngarkuar Ministria e Ekonomisë dhe Inovacionit; Agjencia Shtetërore e Kadastrës dhe Bashkia Kukës.

/rtsh.al/