Partia e kryeministres japoneze Sanae Takaichi siguron shumicë historike në zgjedhjet e parakohshme

Partia Liberal Demokratike (LDP) e kryeministres japoneze Sanae Takaichi ka fituar një shumicë të madhe në zgjedhjet e parakohshme të së dielës, sipas transmetuesit publik NHK. LDP mori më shumë se 310 nga 465 vendet në Dhomën e Ulët të Parlamentit, duke shënuar herën e parë që nga Lufta e Dytë Botërore që një parti e vetme fiton dy të tretat e vendeve. Koalicioni më i gjerë qeverisës arriti mbi 340 vende.

Takaichi falënderoi votuesit që “i rezistuan të ftohtit dhe ecën nëpër rrugët me dëborë për të hedhur votën e tyre”. Ajo tha se synonte të siguronte një mandat për politikën e saj fiskale të përgjegjshme dhe proaktive, e cila do të ndryshonte ndjeshëm politikën ekonomike dhe fiskale të Japonisë.

Takaichi arriti të ruajë popullaritetin e saj që kur u zgjodh më pak se katër muaj më parë, duke u bërë gruaja e parë që drejton Japoninë. Duke thirrur zgjedhje të parakohshme, ajo shpresonte të konvertonte këtë popullaritet në një mandat të fortë për partinë e saj, e cila kishte humbur terren vitet e fundit pas një skandali të fondeve politike.

Shumica prej dy të tretash do t’i lejojë LDP-së të anashkalojë votat në Dhomën e Sipërme të Parlamentit dhe të propozojë ndryshime kushtetuese. Po ashtu, LDP-ja dhe partneri i saj i koalicionit, Partia e Inovacionit të Japonisë, do të kenë numrat e nevojshëm për të kryesuar të gjitha komisionet e Dhomës së Ulët.

Sanae Takaichi, ligjvënëse me përvojë, u ngrit në krye të LDP-së në vjeshtën e kaluar, pasi paraardhësi i saj, Shigeru Ishiba, dha dorëheqjen pas një serie humbjesh të mëdha për partinë.

/rtsh.al/