Pas transferimit të Erion Veliajt dhe Ergys Agasit në burgun e Fierit, Sadleva Bodo delegon kompetencat te zëvendësi
Pasi firmosi transferimin e Erion Veliajt nga burgu i Durrësit në atë të Fierit dhe Ergys Agasit nga burgu i Bradasheshit po në Fier, Drejtoresha e Përgjithshme e Burgjeve, Sadleva Bodo, ka deleguar kompetencat te zëvendësi i saj, Anesti Kapllani.
Sipas urdhrit të firmosur më 28 tetor, Kapllani do të ushtrojë të gjitha kompetencat e funksionit të Drejtorit të Përgjithshëm të Burgjeve, nga ora 08:40 e datës 29 tetor deri në orën 13:00 të datës 1 nëntor.
Në dokumentin zyrtar përcaktohet se gjatë periudhës së delegimit, Anesti Kapllani duhet të përshtatë punën me porositë e titullarit, duke shmangur ndryshimet thelbësore që nuk janë të domosdoshme në rrethana të posaçme.
Gjithashtu, zëvendësdrejtori duhet të informojë në mënyrë të detajuar, në rrugë elektronike, Drejtorin e Përgjithshëm për aktivitetin ditor, në përfundim të orarit zyrtar.
Vendimi:
Tiranë më 28.10.2026
URDHËR PËR DELEGIM AUTORITETI
Në zbatim të Ligjit 44/2015 “Kodi i Procedurave Administrative i Republikës së Shqipërisë”. Ligjit Nr.90/2012 “Për organizimin dhe funksionimin e administratës shtetërore”. Ligjit Nr. 129/2024 për disa ndryshime në Ligjin 81/2020 “Për të drejtat dhe trajtimin e të dënuarve me Burgim dhe të Paraburgosurve”, në Urdhrin nr. 122, datë 13.02.2025 të Ministrit të Drejtësisë, të ndryshuar me urdhër nr. 135, datë 19.02.2025. “Për miratimin e rregullores “Për përcaktimin e metodave të brendshme të punës e sjelljen e personelit të Drejtorisë të Përgjithshme të Burgjeve dhe të Institucioneve të Ekzekutimit të Vendimeve Penale”:
URDHËROJ:
- Delegimin e autoritetit Drejtor i Përgjithshëm i Burgjeve, tek Z. Anesti Kapllani me detyrë Zv.Drejtor i Përgjithshëm.
- Ushtrimi i autoritetit të deleguar në këtë urdhër është i vlefshëm nga data 29.10.2026, ога 08:40, deri në datën 01.11.2026, oга 13:00.
- Gjatë kësaj periudhe i ngarkuari me detyrë duhet të përshtasi punën me porositë e titullarit, duke mos synuar ndryshime themelore që nuk kërkohen patjetër në rrethana të posaçme
- Autoriteti i deleguar në këtë urdhër nënkupton ushtrimin nga Z. Kapllani të të gjithë kompetencave të funksionit të Drejtorit të Përgjithshëm të Burgjeve.
- Në përfundim të orarit zyrtar Z. Kapllani, informon në mënyrë të detajuar në rrugë elektronike në lidhje me aktivitetin ditor tek Drejtori i Përgjithshëm.
Ky urdhër hyn në fuqi menjëherë.
DREJTORI I PËRGJITHSHËM
SADLEVA BODO
TRANSFERIMI I VELIAJT
Kujtojmë se transferimin e tij, Erion Veliaj e cilësoi si “transferim politik” dhe deklaroi se për të bëhej fjalë për një “rrëmbim policor”.
Në reagimin e tij më 28 tetor, Veliaj pretendoi se punonjësit e Policisë së Burgjeve ishin paraqitur për ta transferuar, ndërsa atij dhe avokatit të tij u ishte refuzuar vënia në dispozicion e urdhrit dhe e arsyeve ligjore që justifikonin vendimin.
Ndërkohë, Drejtoria e Përgjithshme e Burgjeve, në reagimin e saj pas pretendimeve të Veliajt, ka deklaruar se lëvizja është kryer në kuadër të masave për garantimin e sigurisë dhe mbarëvajtjen e institucioneve të ekzekutimit të vendimeve penale.
Në reagimin zyrtar, Drejtoria e Burgjeve theksoi se sa i përket urdhrit të transferimit, akti është miratuar sipas procedurave standarde dhe është pjesë e dokumenteve të klasifikuara si “sekret shtetëror”.