“Plumbi i Artë”, GJKKO 3 muaj afat SPAK-ut për plotësim dhe verifikim të akteve

Në procesin për fraksionin e ndarë të dosjes “Plumbi i Artë”, me disa nga personazhet më të njohur të botës së krimit, Gjykata e Posaçme i ka lënë 3 muaj afat kohor SPAK për plotësim dhe verifikim të disa akteve.

Vendimi erdhi pas kërkesës së disa avokatëve të të pandehurve që janë të gjithë në mungesë, të cilët pretenduan për parregullsi dhe shkelje të procesit të rregullt ligjorë.

GJKKO i ka lënë afat organit të akuzës deri në datë 29 maj për të bërë verifikimet e kërkuara për disa prej të pandehurve.

Pjesë e këtij grupi janë shtetasit Suel Çela (Marjus Lulaj), Talo Çela, Eljo Bitri, Festim Qoli, Agron (Kamber) Mehja, Abedin Mama, Aleks Çela,  Florenc Çapia, Ervis Martinaj, Alket Xhixha dhe Elvin Merlika.

Nga këta, Alket Xhixha dhe Elvin Merlika janë të arrestuar, pjesa tjetër po gjykohen në mungesë

Ndaj të gjithë grupit është lëshuar masë “arrest në burg” nga GJKKO, por nuk është ekzekutuar për asnjërin nga policia e shtetit.

Këta të pandehur akuzohen si pjesë e disa grupeve kriminale të përfshirë në vrasje dhe sigurim kushtesh dhe mjetesh për të kryer atentate.

“Plumbi i Artë” u quajt mega operacioni i SPAK në maj 2022, i cili 8 grupe kriminale në Elbasan, Durrës dhe në Tiranë.

Operacioni në fjalë erdhi menjëherë pas arrestimit të shumë të kërkuarit Nuredin Dumani, i cili u kap gjatë operacionit policor të koduar “Arratia” në Fier.