Presidenti Begaj voton në Tiranë: Procesi i qetë, i rëndësishëm për qytetarët dhe demokracinë

Presidenti i Republikës, Bajram Begaj, votoi sot së bashku me bashkëshorten e tij në ambientet e shkollës 9-vjeçare “Kongresi i Lushnjës” në Tiranë.

Pas votimit, Presidenti Begaj iu përgjigj interesit të mediave, duke e vlerësuar procesin si të qetë dhe duke theksuar rëndësinë e tij për qytetarët dhe demokracinë shqiptare.

“Procesi është i qetë. Proceset zgjedhore janë të rëndësishme për qytetarët dhe demokracinë. Kemi hapur negociatat për anëtarësim në Bashkimin Evropian. Për herë të parë voton diaspora. Zgjedhjet duhet të përmbushin standarde më të mira,” deklaroi Presidenti Begaj.

Ai u bëri thirrje qytetarëve që të shprehin lirisht vullnetin e tyre, pa presion dhe me përgjegjësi, duke theksuar se kjo ditë duhet të jetë një ditë feste për të gjithë.

Presidenti Begaj nënvizoi gjithashtu rëndësinë e një administrimi dhe numërimi korrekt të votave, duke theksuar se administratorët zgjedhorë kanë detyrimin ligjor t’u përgjigjen kërkesave të qytetarëve.

https://www.youtube.com/watch?v=GW_bLZ2t-Sk

3.7 milion qytetarë do të votojnë sot për të zgjedhur parlamentin e ri të Shqipërisë dhe forcën politike që do të drejtojë vendin në 4 vitet e ardhshme.

Në këto zgjedhje janë regjistruar 8 parti dhe 3 koalicione dhe në total janë në garë 2.046 kandidatë të cilët garojnë për 140 vendet e Kuvendit të Shqipërisë që do të zgjidhen në bazë të sistemit proporcional rajonal.

Në të gjithë vendin janë ngritur 5.225 qendra votimi dhe 93 qendra numërimi; ndërkohë që në njësinë nr. 10 në Tiranë dhe në Vorë aplikohet si projekt pilot votimi dhe numërimi elektronik.

Në listën e zgjedhësve 114.642 janë votues për herë të parë. Ndërkohë që për shkak të ligjit të dekriminalizimit 1.081 shqiptarë që janë dënuar për krime të rënda nuk kanë të drejtë të votojnë.

Për herë të parë në historinë e zgjedhjeve parlamentare në vend, 246 mijë qytetarë që jetojnë jashtë vendit janë regjistruar për të marrë pjesë në këtë garë elektorale.