Prokuroria në Prishtinë, aksion në Agjencinë e Regjistrimit të Bizneseve/ Dyshim për korrupsion, drejtoresha dhe dy zyrtarë merren në pyetje

Prokuroria Themelore në Prishtinë ka zhvilluar një aksion në ambientet e Agjencisë për Regjistrimin e Bizneseve.

Përmes një komunikate për media, Prokuroria bëri të ditur se ekziston dyshimi i arsyeshëm se drejtoresha e institucionit Ikballe Rexha dhe dy zyrtarë të tjerë dyshohen për veprën penale ‘’Keqpërdorimi i pozitës apo autoritetit zyrtar’’.

Ata duke shfrytëzuar detyrën dhe autoritetin, me dashje dhe me qëllim kanë ndërmarrë veprime të kundërligjshme me qëllim të përfitimit: dobi pasurore në mënyrë të kundërligjshme.

Sipas prokurorisë, dëmi i tyre në buxhetin e shtetit dyshohet të jetë mbi 50.000 euro.

Me vendim të prokurorit të shtetit, të dyshuarit janë liruar në procedurë të rregullt, ndërsa rasti po vazhdon të hetohet.