Protestat pro evropiane në Gjeorgji, mbi 300 të arrestuar pas gjatë netësh përleshjesh
Mbi 300 persona janë arrestuar në Gjeorgji që kur protestat shpërthyen gjashtë netë më parë për shkak të vendimit nga partia në pushtet për të “ngrirë” negociatat e vendit me Bashkimin Evropian.
Imazhet e qarkulluara gjerësisht në mediat sociale tregojnë gjeorgjianë të plagosur në rrugë dhe përleshje të dhunshme midis protestuesve dhe oficerëve të policisë duke përdorur gaz lotsjellës.
Kryeministri Irakli Kobakhidze i partisë pro-ruse ‘Ëndrra Gjeorgjiane’ ka akuzuar politikanët e opozitës për orkestrimin e dhunës dhe i fajëson ata për lëndimet e protestuesve.
Volker Türk, zyrtari më i lartë i OKB-së për të drejtat e njeriut, e ka quajtur përdorimin e forcës kundër protestuesve “jashtëzakonisht shqetësues”. Robin Dunnigan, ambasadori i SHBA në Gjeorgji, tha se ambasada kishte qenë dëshmitare e “dhunës policore” dhe i bëri thirrje qeverisë të rishqyrtojë vendimin e saj për të mos ndjekur negociatat e pranimit në BE.
Njoftimi i Ëndrrës Gjeorgjiane se do të ndalonte bisedimet e pranimit në BE më 28 nëntor erdhi disa orë pasi Parlamenti Evropian miratoi një rezolutë kritike për rezultatin e zgjedhjeve të tetorit, në të cilat partia siguroi një shumicë parlamentare.
Rezultati i zgjedhjeve është kontestuar ashpër nga grupet opozitare të vendit dhe shumë vëzhgues ndërkombëtarë, të cilët pretendojnë se procesi zgjedhor ishte i padrejtë dhe i manipuluar me metoda të ndryshme.
BE i dha Gjeorgjisë statusin e kandidatit në dhjetor 2023, por e vuri pranimin e saj në pritje dhe shkurtoi mbështetjen financiare në fillim të këtij viti pasi Ëndrra Gjeorgjiane miratoi të ashtuquajturin projektligjin e saj për “agjentët e huaj”, që kritikët thonë se imiton legjislacionin e miratuar në Rusi./abcnews.al