Putin bisedë telefonike me Scholz dhe Macron: Rusia është gati të rifillojë dialogun me Kievin

Presidenti rus Vladimir Putin, në një bisedë telefonike me homologun e tij francez Emmanuel Macron dhe kancelarin gjerman Olaf Scholz, konfirmoi gatishmërinë e Moskës për të vazhduar bisedimet e paqes me Kievin. Kjo u bë e ditur sot nga shërbimi për shtyp i Kremlinit.

“Vëmendje e veçantë iu kushtua gjetjes së rrugëve të negociatave, të cilat janë ngrirë për shkak të Kievit. Vladimir Putin konfirmoi se Rusia është e hapur për rifillimin e dialogut,” thuhet në deklaratë, cituar nga agjencia e lajmeve Tass.

Armët perëndimore tha Putin, në bisedën telefonike me Macron dhe Scholz, shtojnë rrezikun e shpërthimit të situatës në Ukrainë.

“Presidenti rus theksoi gjithashtu çështjen e tensionimit të rrezikshëm në Ukrainë me armë perëndimore, duke paralajmëruar për rreziqet e destabilizimit të mëtejshëm të situatës dhe përkeqësimit të krizës humanitare”, thuhet në deklaratë.

Probleme me ushqimin

Problemet me furnizimin me ushqime u shkaktuan nga sanksionet anti-ruse dhe gabime të tjera të Perëndimit, tha presidenti rus në një bisedë telefonike, njoftoi shërbimi për shtyp.

“Bazuar në të dhëna specifike, Vladimir Putin shpjegoi arsyet reale të vështirësive me furnizimin me ushqime, të cilat ishin rezultat i politikave të gabuara ekonomike dhe financiare të vendeve perëndimore, si dhe sanksioneve anti-ruse që ata vendosën”, thuhet në deklaratë.

Kremlini vuri në dukje, “Rusia është e gatshme të ndihmojë në gjetjen e opsioneve për eksportet e papenguara të grurit, duke përfshirë eksportet e grurit ukrainas nga portet e Detit të Zi”.

Rritja e furnizimeve me plehra dhe produkte bujqësore ruse do të ndihmojë gjithashtu në uljen e tensionit në tregun global të ushqimit, i cili, natyrisht, do të kërkonte heqjen e kufizimeve përkatëse”, thuhet në deklaratë.

“Udhëheqësit ranë dakord të vazhdojnë kontaktet,” tha Kremlini.

Ministri i Jashtëm rus Sergej Lavrov tha më herët se kriza globale e ushqimit ndodhi shumë kohë përpara fillimit të operacionit ushtarak në Ukrainë, për shkak të faktorëve të tillë si pandemia dhe llogaritjeve të gabuara të vendeve perëndimore. Në të njëjtën kohë, Lavrov shtoi se situata aktuale e ka përkeqësuar problemin dhe sanksionet perëndimore janë bërë një nga arsyet kryesore për ndërprerjen e furnizimit me ushqime, gjë që e përkeqësoi krizën.

/rtsh.al/