ROMË – Referendum mbi reformën gjyqësore, Meloni përballet me një provë të rëndësishme politike

ROME, 22 mars /ATSH/ – Kryeministrja konservatore e Italisë, Giorgia Meloni, përballet me një provë të rëndësishme politike në një referendum dyditor mbi reformën gjyqësore që fillon sot, një votim që është transformuar në një gjykim më të gjerë mbi lidershipin e saj brenda dhe jashtë vendit.

Fillimisht e prezantuar si një rishikim teknik i sistemit të drejtësisë, reforma ka mprehur përçarjet politike dhe ka bashkuar opozitën e qendrës së majtë, duke e shndërruar referendumin në një përballje simbolike të forcës së Melonit një vit para zgjedhjeve kombëtare.

Sondazhet e fundit tregojnë se gara mbetet shumë e ngushtë për t’u përcaktuar, me kampin “Jo” që po fiton vrull të vonë në një klimë të polarizuar ku pjesëmarrja mund të jetë vendimtare.

Lorenzo Pregliasco, analist politik dhe ekspert i sondazheve në YouTrend, tha se një refuzim i reformës do të mbante peshë të konsiderueshme politike.

Një fitore e mundshme e ‘Jo’ do të dërgonte një sinjal politik, duke dobësuar aurën e pathyeshmërisë së Melonit, ndërsa do ta shtynte opozitën e qendrës së majtë të thoshte se tashmë ekziston një alternativë në vend”.

Meloni fillimisht shmangu lidhjen shumë të ngushtë të imazhit të saj me referendumin, e kujdesshme nga rreziku që një humbje mund ta dobësonte atë brenda dhe jashtë vendit.

Aktualisht ajo kryeson qeverinë më të qëndrueshme të Italisë në vite, pasi fitoi besueshmëri midis aleatëve të saj evropianë si një udhëheqëse karizmatike. Një fitore në referendum do ta forconte më tej qëndrimin e saj në vend, së bashku me reputacionin e saj ndërkombëtar.

Kjo është arsyeja pse, ndërsa votimi afrohej dhe sondazhet u shtrënguan, kryeministrja italiane ndryshoi strategji dhe përqafoi plotësisht fushatën “Po”. /os/