Rama - Antishteti

Shembulli i parë i kreut të PS-së si shtetar është ai i mosnjohjes së kushtetutës dhe ligjeve të shtetit. Në mënyrë të paprecedentë, Edi Rama flet për një qeveri kujdestare dhe për anullim të të gjitha vendimeve të dy muajve të fundit.

Reagimi i kryeministrisë/“Qeveria do të përmbushë detyrimet bazuar në ligjet dhe Kushtetutën e vendit. Kërkesa e Ramës, antikushtetuese”

 “Kryeministri i kërkon zotit Rama të heqë dorë nga kërcënimet dhe sulmet ndaj institucioneve kushtetuese dhe siguron qytetarët se qeveria në detyrë do vazhdojë normalisht përmbushjen e detyrimeve të saj dhe se Kushtetuta dhe institucionet e vendit nuk do mund të pengohen, as edhe të ndikohen nga revanshi i papërmbajtur i tij ndaj tyre”. Ky ishte qëndrimi i ardhur sot nga Kryeministri Berisha, lidhur me pretendimet e drejtuesve të majtë. Përmes zëdhënëses së tij, Erla Mëhilli, kreu i mazhorancës ka sqaruar bazuar në të drejtën që i jep Kushtetuta e vendit mbi të gjithë veprimtarinë në krye të ekzekutivit. “Këto ditë, zoti Edi Rama, kryetar i mazhorancës së re, ka ndërmarrë sulme dhe kërcënime ndaj institucioneve kushtetuese të vendit, veprimtarisë normale të qeverisë, vendimeve të saj. Lidhur me këto qëndrime, shprehje e një revanshi të papërmbajtur të zotit Rama, sqarojmë se Kushtetuta, me nenet e saj 65; 67; 96; 99, përcakton shumë qartë datën e fillimit dhe mbarimit të mandatit të një mazhorancë dhe kryeministrit të saj”, u shpreh Mëhilli, gjatë deklaratës së saj për shtyp. Po në këtë linjë, ajo sqaroi se sipas nenit 65 të Kushtetutës, mandati i Kuvendit përfundon të njëjtën datë të të njëjtit muaj të vitit të katërt nga data e mbledhjes së parë dhe data e mbledhjes së parë është data 7 shtator 2009 dhe sipas nenit 67 të saj, Presidenti i Republikës mbledh Kuvendin e porsazgjedhur jo më parë se data e përfundimit të mandatit të Kuvendit paraardhës. Pra, Kuvendi i ri nuk mund të mblidhet para datës 7 shtator. Gjithashtu, në këtë deklaratë për shtyp, Mëhilli risolli në kujtesë faktin se sipas nenit 96 të Kushtetutës, Presidenti i Republikës, në fillim të legjislaturës emëron kryeministrin, pra, pasi mblidhet Kuvendi i ri dhe ky i fundit, sipas nenit  99 të saj,  para fillimit të detyrës bën betimin para Presidentit të Republikës, çka do të thotë  se  mandati i kryeministrit  mbaron pas betimit të pasardhësit të tij. Pra, kjo qeveri ka mandat të plotë Kushtetues  për të ushtruar pushtetin e saj ekzekutiv në zbatim të programit për të cilin është votuar gjer ditën e fillimit të mandatit të mazhorancës së re. Të gjitha vendimet e qeverisë janë dhe do jenë  në përputhje me programin e saj të mandatit që ushtron dhe  të bazuara  në Kushtetutën dhe ligjet e vendit. “Antikushtetuese dhe dëshmi e revanshit të papërmbajtur janë sulmet,  kërcënimet e zotit Rama ndaj institucioneve të vendit. Antikushtetues është  pretendimi i tij për qeveri kujdestare. Kushtetuta e Shqipërisë dhe e asnjë vendi në Europë, por dhe thuajse në tërësi, me ndonjë përjashtim shumë të rrallë, nuk njohin e nuk parashikojnë qeveri kujdestare, të lidhura me zhvillimin e zgjedhjeve. Ky kuadër ligjor ekziston i sanksionuar në Kushtetutën  e Bangladeshit, e cila 3 muaj para zgjedhjeve  i jep kryesimin  e qeverisë kujdestare kryetarit të Gjykatës Kushtetuese  dhe tepër rrallë në ndonjë vend tjetër, mbi bazë ligjore të përcaktuar mirë”, vlerësoi zëdhënësja e Kryeministrit, lidhur me një çështje të tillë.