Rama: Restaurohet Kisha e Shën Mërisë në Mamurras
TIRANË, 15 korrik/ATSH/ Kisha e Shën Mërisë në fshatin Shënmëri, Mamurras tashmë është një tjetër destinacion i turizmit historik e kulturor, falë projektit për rijetësimin e saj, që ka rikthyer vlerat e këtij objekti kishtar që daton prej shekullit XV.
Me status Monument Kulture i Kategorisë së parë, kjo kishë i është nënshtruar restaurimit tërësor.
Kryeministri Edi Rama ndau sot në rrjetet sociale pamje të kishës, ndërsa u shpreh se një tjetër thesar i vyer i trashëgimisë sonë kulturore ka dalë në dritë.
“Ndërhyrja e bërë nga specialistët përkatës konsiston në restaurimin dhe konsolidimin e mureve të kishës, restaurim i pikturës murale si dhe vendosja e një strehe metalike tek pjesa e absidës aty ku gjendet edhe piktura murale”, u shpreh Rama.
Kisha ndodhet në fshatin Shënmëri, Mamurras dhe paraqet interes të veçantë si një dëshmi arkitekturore që mbart gjurmë të disa fazave ndërtimore, që përfshijnë periudhën rreth shek. XI-XIV.
Në kuadër të restaurimit të rrënojave të Kishës së Shën Mërisë, u realizuan disa ndërhyrje.
Fillimisht u pastrua hapësira përreth objektit nga vegjetacioni.
Po ashtu u hoqën elementët jo autentikë brenda kishës, si dhe u restaurua muri i gurit antik si dhe çarja e mureve të gurit.
1 nga 9/m.m/