Rama në Shkup, shëtit në Çarshinë e Vjetër i shoqëruar nga Bujar Osmani

Kryeministri Edi Rama ndodhet në Shkup në kuadër të Samitit BE–Ballkani Perëndimor.

Përveç pjesëmarrjes në këtë ngjarje ndërkombëtare, ai ka zhvilluar një vizitë në Çarshinë e Vjetër të qytetit, një hapësirë e rëndësishme për trashëgiminë kulturore shqiptare në zemër të Shkupit.

Gjatë kësaj shëtitjeje, kreu i qeverisë shqiptare u shoqërua nga nënkryetari i BDI-së, Bujar Osmani, teksa u takuan me qytetarë të shumtë të kësaj zone historike.

Çarshia e Vjetër, e vendosur në komunën e Çairit, është një zonë kyçe për partitë politike shqiptare në Maqedoninë e Veriut dhe një tregues i peshës elektorale që ato gëzojnë në skenën vendore.

Ky moment shihet si një sinjal i një bashkëpunimi më të ngushtë ndërshqiptar në rajon. Në sfondin e Samitit për integrimin evropian, vizita në këtë hapësirë identitare merr një dimension të veçantë, duke përçuar mesazhe uniteti dhe fuqizimi të përfaqësimit shqiptar në rajon.

Gazetare: Rugova Dunisha

/rtsh.al/