Rama vlerëson punën e AQSHF-së: Restauratorët po i japin jetë të re filmit “Dimri i fundit”
Departamenti i Audiovizualit pranë Arkivit Qendror Shtetëror të Filmit (AQSHF) ka nisur punën për restaurimin e filmit të njohur shqiptar “Dimri i fundit”, si dhe të disa materialeve të tjera me vlerë historike e kinematografike.
Lajmi është bërë i ditur nga Kryeministri Edi Rama përmes një postimi në rrjetet sociale, të cilin e ka shoqëruar edhe me një video ilustruese nga procesi delikat i punës teknike.
Vlerësimi për profesionistët e vetëm të restaurimit
Në reagimin e tij, shefi i qeverisë ka shprehur konsideratë për specialistët e këtij departamenti, duke i cilësuar si të vetmit profesionistë të kësaj fushe në vend.
“RESPEKT! Restauratorët e vetëm të filmit në Shqipëri, pjesë e Arkivit Qendror Shtetëror të Filmit. Aktualisht departamenti i audiovizualit në AQSHF po restauron filmin ‘Dimri i fundit’ dhe materiale të tjera,” shkruan Rama.
Procesi i restaurimit të fondit filmik shqiptar synon ruajtjen e memories vizuale dhe rritjen e cilësisë së transmetimit të veprave kinematografike sipas standardeve bashkëkohore digjitale.
/rtsh.al/