Rilind shkolla 9-vjeçare “Kushtrimi i Lirisë” në Durrës, Rama: Gati për shtator me standarde evropiane
Shkolla 9-vjeçare “Kushtrimi i Lirisë” në Durrës po merr një pamje krejtësisht të re dhe moderne, me punime rikonstruksioni që po ecin me ritme të shpejta. Objekti arsimor pritet të jetë gati në shtator për të mirëpritur rreth 800 nxënës dhe 28 fëmijë të kopshtit, i cili do të funksionojë në të njëjtën godinë.
Ky investim thelbësor parashikon standarde evropiane në ndërtim, duke garantuar një mjedis mësimor bashkëkohor dhe funksional. Kryeministri Edi Rama ndau sot në rrjetet sociale pamje nga punimet, duke theksuar progresin e bërë.
Kryeministri theksoi se në Durrës janë rindërtuar 70 shkolla, kopshte dhe çerdhe, të cilat ofrojnë kushte sipas standardeve të Bashkimit Evropian.
Pas rikonstruksionit, shkolla “Kushtrimi i Lirisë” do t’i shtohet listës së objekteve arsimore të rehabilituara në të gjithë vendin, që synojnë të garantojnë kushte mësimi dhe pune shumë të mira si për nxënësit, ashtu edhe për mësuesit.
Kjo dëshmon angazhimin për përmirësimin e infrastrukturës arsimore, duke siguruar që brezi i ri të ketë akses në ambiente moderne dhe stimuluese për zhvillimin e tyre.
/rtsh.al/