Rruga Pogradec-Tushemisht-Doganë, lidhet kontrata 3.48 milionë USD
Një kontratë me vlerë 3.48 milionë dollarë është nënshkruar për rikonstruksionin e Lotit të 2-të të Rrugës Pogradec-Tushemisht-Doganë.
Autoriteti Kontraktor i kësaj procedure ishte Fondi Shqiptar i Zhvillimit. Sipas njoftimit zbatimi do të bëhet nga bashkimi i operatorëve “4 A – M” shpk & “GPG Company” shpk. Punimet e përcaktuara në kontratë sa i takon rikonstruksionit të plotë të rrugës parashikohet të mbyllen brenda 6 muajve.
Projekti synon rikonstruksionin e plotë të rrugës Pogradec-Tushemisht. Punimet e kërkuara përbëhen nga: ndërtimi i rrugëve, rikonstruksioni i rrugëve, punimet e përmirësimit urban, punimet e rehabilitimit të peizazhit.
Rindërtimi i rrugës do të rrisë vlerën e aseteve përreth, do të lehtësojë aksesin dhe lëvizshmërinë e banorëve të zonës dhe aksesin në kala nga turistët.
Rruga Pogradec-Tushemisht-Doganë është pjesë e projektit të Konektivitetit të Rrugëve Rajonale dhe Lokale i cili mbështetet nga Banka Botërore prej disa vitesh tashmë. Ai parashikon ndërhyrje në rritjen potenciale të aktiviteteve bujqësore dhe turistike duke përmirësuar aksesin në zonat e përzgjedhura, si dhe forcim të kapaciteteve të bashkive për menaxhimin e aseteve të tyre rrugore.
Ky projekt ka një fond prej 50 milion USD dhe përbëhet nga tre komponentë kryesorë: Punimet civile dhe iniciativat për sigurinë rrugore; forcimi i kapaciteteve për NjQV-të; menaxhimi gjatë zbatimit.
/ rtsh.al /