Rusi, gazeta e pavarur “Novaya Gazeta” njofton mbylljen pas më shumë se 30 vitesh - ATSH -

MOSKË, 31 tetor /ATSH/ – Gazeta e pavarur ruse “Novaya Gazeta” do të ndërpresë veprimtarinë e saj më 9 nëntor, pas më shumë se 30 vitesh publikimi, njoftoi redaksia e saj më 30 tetor.

Në deklaratën e publikuar në faqen zyrtare, gazeta bëri të ditur se do të mbyllë zyrat në Moskë dhe do të ndërpresë funksionimin e serverëve, duke ia atribuar vendimin presionit të autoriteteve dhe shërbimeve ruse të sigurisë. 

E themeluar në vitin 1993 me mbështetjen e ish-presidentit sovjetik Mikhail Gorbachev, “Novaya Gazeta” u bë e njohur për raportimet investigative mbi korrupsionin, politikën dhe shkeljet e të drejtave të njeriut në Rusi.

Gazeta ndërpreu botimin e saj të shtypur në Rusi në vitin 2022, pas nisjes së pushtimit rus të Ukrainës, ndërsa vazhdoi të publikonte përmbajtje në internet. Në vitet që pasuan, ajo u përball me kufizime ligjore, bllokimin e platformave online dhe revokimin e licencës së botimit. 

Sipas agjencisë Reuters, vendimi për mbylljen vjen pas zhvillimeve të fundit që përfshijnë humbjen e ambienteve të redaksisë dhe ndërprerjen e burimeve financiare, ndërsa një prej redaktorëve të saj të lartë është nën procedim penal.

Mbyllja shënon fundin e veprimtarisë së një prej mediave më të njohura të pavarura në Rusi, e cila për dekada ka raportuar mbi çështje të ndjeshme politike dhe shoqërore. 

Sipas Ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar Agjencinë Telegrafike Shqiptare.