Rusia: Parandaluam një sulm ukrainas me gaz toksik në rajonin e Zaporizhia
Rusia pretendon se ka penguar një sulm me gaz toksik në rajonin e Zaporizhias nga Ukraina.
“Një përpjekje e shërbimeve sekrete ukrainase për të kryer një sulm në rajonin e Zaporizhia duke përdorur ekuivalentin e një agjenti toksik ushtarak BZ sipas klasifikimit të NATO-s u parandalua”, njoftoi shërbimi rus i sigurisë FSB.
Sipas Rusisë, agjentët toksikë të sekuestruar në këtë operacion “përdoren për prodhimin e armëve kimike të shkatërrimit në masë dhe janë projektuar në SHBA”.
Autoritetet ruse kanë nisur një hetim për sulmin dhe prodhimin e armëve të shkatërrimit në masë dhe tre shtetas ukrainas janë arrestuar.
Rajoni i Zaporizhia është një nga katër rajonet e Ukrainës, së bashku me Kherson, Donetsk dhe Luhansk që Rusia njoftoi se do t’i aneksonte në vitin 2022, megjithëse ato nuk kontrollohen plotësisht nga ushtria ruse./ CNN.gr
/rtsh.al/