Rusia dhe SHBA- "shumë larg"për mburojën raketore

Presidenti i Rusisë, Dimitri Medvedev, tha se Rusia dhe Shtetet e Bashkuara janë “shumë larg” arritjes së një gjuhe të përbashkët për planet amerikane rreth ndërtimit në një mburoje raketore në Evropë.

Komentet e tij erdhën pas takimit që Medvedev zhvilloi me homologun e tij amerikan gjatë samitit në Honululu.

Ai tha se ka rënë dakort me Obamën “për të vazhduar kërkimin” e një zgjidhjeje të mundshme, por tha se qëndrimet e Shteteve të Bashkuara dhe Rusisë rreth kësaj çështje “mbesin ende larg njëra-tjetrës”.

Plani amerikan për ndërtimin e mburojës raketore në Evropë thuhet se ka për qëllim mbrojtjen nga sulmet eventuale me raketa nga Irani apo shtetet e tjera.

Shtetet e Bashkuara kanë theksuar vazhdimisht se mburoja raketore nuk është projektuar për t`u përdorur kundër Rusisë, por Moska zyrtare e ka cilësuar si rrezik potencial një mburojë të tillë.