Rusia shton operacionet, disa raketa godasin Ukrainën

Rusia ka urdhëruar forcat e saj në Ukrainë që të shtojnë operacionet, tha të shtunën ministria e saj e mbrojtjes, ndërsa raketat goditën vendin nga një seri bombardimesh.

Në sulmet e fundit, raketat goditën qytetin verilindor të Chuhuiv në rajonin e Kharkiv, duke vrarë tre persona dhe duke plagosur tre të tjerë, tha guvernatori rajonal Oleh Synehubov. 

Në jug, guvernatori rajonal Valentyn Reznichenko tha se më shumë se 50 raketa ruse Grad ranë në qytetin e Nikopolit, në lumin Dnipro. Dy persona u vranë.

Ukraina thotë se rreth 40 njerëz janë vrarë në sulme të tilla në zonat urbane në tre ditët e fundit, shruan Reuters.

Ministria ruse e mbrojtjes tha në një deklaratë në faqen e saj të internetit se ministri i Mbrojtjes Sergei Shoigu kishte urdhëruar njësitë ushtarake të rrisin operacionet e tyre për të parandaluar sulmet në Ukrainën lindore dhe territore të tjera të kontrolluara nga Rusia.

Shoigu, “ka dhënë udhëzimet e nevojshme për të rritur më tej veprimet e grupeve në të gjitha zonat operative, në mënyrë që të përjashtohet mundësia që regjimi i Kievit të nisë sulme masive me raketa dhe artileri mbi infrastrukturën civile dhe banorët e vendbanimeve në Donbas dhe rajone të tjera”.

/rtsh.al/