SARANDE: I vihet tritol dyqanit në mes të qytetit, mister autorët
SARANDE- Një sasi tritoli që shpërtheu dje në një dyqan në qendër të Sarandës ka tronditur banorët e këtij qyteti. Ngjarja ndodhi në Lagjen Nr.3, në një butik veshjesh që ndodhet në katin e parë të një pallati katërkatësh. Persona ende të paidentifikuar kanë vendosur një sasi tritoli në objektin e marrë me qira nga shtetasja Fani Dushaj. Prej dy vitesh ajo tregtonte në këtë mjedis mallra të firmës BSB. Nga burime paraprake policore mësohet se lënda eksplozive, e dyshuar si e ajo e llojit tritol, të ketë qenë në masën e 150 gramëve. Lënda eksplozive ishte vendosur te pragu i derës së jashtme të dyqanit, te qepeni. Si pasojë e shpërthimit nuk ka pasur të lënduar, por vetëm dëme materiale. Është hera e tretë brenda një periudhe kohore prej 3 vitesh që pronarja e butikut bëhet objekt i sulmit me eksploziv dhe grabitje. Në dhjetor të 2009-s, një sasi tritoli është vendosur në automjetin e saj fuoristradë tip Peugeot. Në të njëjtin vit dyqani është vjedhur nga persona ende të paidentifikuar. Ngjarje kriminale me shpërthime të lëndëve eksplozive dhe grabitje me maska e armë janë bërë fenomene shqetësuese në Sarandë. Pak kohë më parë, policia arrestoi disa persona të dyshuar, ndërsa disa të tjerë janë në kërkim. sh.d