SHBA – Dy të vdekur, një i mbijetuar pas sulmit amerikan ndaj një anijeje të dyshuar për trafik droge

UASHINGTON, 10 shkurt /ATSH-DPA/- Një sulm ajror amerikan ndaj një anijeje që transportonte të dyshuar për trafik droge në Paqësorin lindor shkaktoi vdekjen e dy personave, sipas ushtrisë amerikane.

“Një person i tretë mbijetoi”, tha sot Komanda Jugore e SHBA-së (SOUTHCOM), përgjegjëse për rajonin, në platformën X.

“Roja Bregdetare e SHBA-së është njoftuar për të kërkuar të mbijetuarin”, shtoi ajo.

“Anija drejtohej nga një grup – i përcaktuar si organizatë terroriste”, tha SOUTHCOM, duke shtuar se sipas shërbimit sekret, anija po udhëtonte përgjatë një rruge të njohur të trafikimit të drogës.

Që nga shtatori i vitit të kaluar, forcat amerikane kanë synuar vazhdimisht anije të shpejta në Karaibe dhe Paqësor që dyshohet se transportonin drogë.

Shifrat zyrtare tregojnë se rreth 40 sulme kanë vrarë pothuajse 130 persona.

Strategjia më e fundit e mbrojtjes kombëtare të SHBA-së, nën drejtimin e presidentit Donald Trump, ka theksuar veprimin ushtarak kundër trafikantëve të dyshuar të drogës si një përparësi.

Kritikët vënë në dyshim ligjshmërinë e sulmeve të tilla vdekjeprurëse në ujërat ndërkombëtare. //a.i/