SHBA – Trump kërkon të publikojë dosjet e jetës aliene dhe jashtëtokësore
UASHINGTON, 20 shkurt /ATSH-DPA/ – Presidenti i SHBA-së Donald Trump tha se dëshiron të publikojë dosjet qeveritare që lidhen me çështje që përfshijnë “jetën aliene dhe jashtëtokësore”.
Trump tha se do t’i drejtojë sekretarit të Mbrojtjes, Pete Hegseth “të fillojë procesin e identifikimit dhe publikimit të dosjeve qeveritare që lidhen me jetën aliene dhe jashtëtokësore, fenomenet ajrore të paidentifikuara (UAP) dhe objektet fluturuese të paidentifikuara (UFO), si dhe çdo informacion tjetër që lidhet me këto çështje shumë komplekse, por jashtëzakonisht interesante dhe të rëndësishme”.
Presidenti i SHBA-së tha se vendimi u bazua “në interesin e jashtëzakonshëm të treguar” në një postim në platformën e tij Truth Social.
Shkalla e publikimit të propozuar dhe kur informacioni do të vihej në dispozicion të publikut fillimisht mbeti e paqartë.
Disa ditë më parë, ish-presidenti amerikan Barack Obama tha në përgjigje të një pyetjeje të shpejtë në një podcast se alienët ishin “të vërtetë, por unë nuk i kam parë”.
Më vonë ai sqaroi në një postim në Instagram se “statistikisht, universi është aq i gjerë sa ka shumë mundësi që të ketë jetë atje jashtë. Por, distancat midis sistemeve diellore janë aq të mëdha sa që shanset që të jemi vizituar nga alienët janë të ulëta dhe nuk pashë asnjë provë gjatë presidencës sime që jashtëtokësorët kanë kontaktuar me ne”.
Trump pretendoi se paraardhësi i tij “dha informacion të klasifikuar”, pa specifikuar se çfarë lloj informacioni ishte ky.
“Ai nuk supozohet ta bëjë këtë”, tha Trump./ a.jor.