SIRI – Numri i të vdekurve pas sulmit izraelit arrin në 71
DAMASK, 21 nëntor /ATSH-AFP/- Sulmet izraelite vranë 71 militantë pro-Iranit në qytetin sirian të Palmirës, me më shumë se një e treta e tyre të identifikuar si luftëtarë nga Iraku dhe Libani, sipas Observatorit Sirian për të Drejtat e Njeriut.
Observatori Sirian për të Drejtat e Njeriut tha se mes të vrarëve përfshiheshin 45 luftëtarë nga grupet siriane pro-Iraniane, 26 luftëtarë të huaj, shumica e tyre nga lëvizja irakiane Al-Nujaba dhe katër nga grupi i armatosur i Hezbollahut të Libanit.
Observatori, i cili është i vendosur në Britaninë e Madhe dhe mbështetet në një rrjet burimesh në terren në të gjithë Sirinë, më parë raportoi 61 viktima nga sulmet izraelite në Palmirë.
“Siria tha se sulmet izraelite në qytetin qendror kishin vrarë 36 njerëz dhe plagosur më shumë se 50 të tjerë”, sipas raportit të fundit të lëshuar nga Ministria e Mbrojtjes.
Sulmet që shënjestruan Palmirën, një qytet modern ngjitur me rrënojat greko-romake, janë më vdekjeprurësit në Siri – që prej një viti të përleshjeve ndërkufitare midis Izraelit dhe Hezbollahut, të intensifikuara në fund të shtatorit.
Në një deklaratë të veçantë, ministria e jashtme siriane dënoi “në termat më të ashpra agresionin brutal izraelit kundër qytetit të Palmirës, i cili pasqyron krimet e vazhdueshme të Sionizmit kundër vendeve të rajonit dhe popujve të tyre”.
Izraeli rrallë komenton mbi sulmet individuale në Siri, por ka thënë vazhdimisht se nuk do të lejojë Iranin të zgjerojë praninë e tij në vend. //a.i/