Samiti/ Varhelyi takim me Ramën: Gati të hapim kapitujt e parë negociues me Shqipërinë

Komisioneri i Bashkimit Evropian për Zgjerimin dhe Fqinjësinë, Oliver Varhelyi ka zhvilluar një takim me kryeministrin Edi Rama në Bruksel, ku ndodhen në kuadër të samitit BE-Ballkani Perëndimor.

Në një postim në X (dikur Twitter), Varhelyi shkruan se mes tij dhe Ramës është diskutuar në lidhje me rrugën e vendit tonë drejt BE, teksa thekson se Unioni është gati të hapë kapitujt e parë negociues.

“Në margjinat të samitit BE-Ballkani Perëndimor, diskutuan me kryeministrin Edi Rama hapat e ardhshëm të Shqipërisë në rrugën drejt BE.

Ndërsa përfunduam screening, ne jemi gati të hapim negociatat e anëtarësimit mbi Bazat – Grupi 1 – në kuadrin e një Konference Ndërqeveritare ende këtë vit”, shkruan Varhelyi.

Këshilli Evropian për Çështjet e Jashtme ka paralajmëruar ndërmarrjen e hapave pasues për anëtarësimin e Shqipërisë në BE. Në konkluzionet e takimit të së martës, Këshilli Evropian përshëndeti përfundimin me sukses të takimeve të shqyrtimit të legjislacionit.

/rtsh.al/