Sanremo 2026, Laura Pausini emocionon Aristonin: Një thirrje universale për paqe me fëmijët e “Piccolo Coro”

Nata e tretë e Festivalit të Sanremos, e cila po transmetohet ekskluzivisht edhe në RTSH-2, ka dhuruar një nga momentet më prekëse dhe domethënëse të këtij edicioni. Laura Pausini është ngjitur në skenën e Aristonit për të përcjellë një mesazh të qartë kundër konflikteve globale, duke bërë bashkë muzikën e Michael Jackson dhe zërat e pafajshëm të fëmijëve.

“Heal the World”, himni i paqes në Sanremo

Nën shoqërimin e pianos dhe korit të famshëm “Piccolo Coro dell’Antoniano”, bashkë me korin e Caivanos, Pausini interpretoi këngën ikonike të Michael Jackson, “Heal the World”. Performanca intensive u shoqërua në sfond nga slogani i madh “Bëjeni Muzikën Jo Luftën” (Make Music Not War), duke e kthyer teatrin në një platformë të hapur të diplomacisë kulturore.

“Ne të gjithë duam një botë pa luftëra, dhe i duam ato për ta,” u shpreh artistja e emocionuar, duke treguar me dorë nga fëmijët e veshur me të bardha, të cilët pas performancës zbritën mes publikut nën duartrokitjet e stuhishme të sallës.

Nga mesazhet serioze te festimi i traditës

Mbrëmja nuk ishte vetëm reflektim, por edhe një festë e traditës muzikore italiane që bashkon brezat. Për të vërtetuar se Sanremo dhe festivali i fëmijëve “Zecchino d’Oro” janë pjesë e pandashme e identitetit kulturor, skena u shndërrua në një karaoke gjigante.

Publiku dhe artistët u bënë njësh duke kënduar hitet historike për fëmijë, si “Tagliatelle di Nonna Pina” dhe “44 Gatti”. Ky moment dëshmoi se Sanremo 2026, siç u theksua edhe në konferencën për shtyp, po arrin të integrojë argëtimin e shfaqjeve të varietesë me tema të rëndësishme sociale, duke ruajtur një shikueshmëri rekord.

/rtsh.al/