Sean Penn në Ukrainë gjatë Oscars, Zelensky e quan “mik të vërtetë”
LOS ANXHELOS, 16 mars /ATSH/ – Aktori amerikan Sean Penn nuk ishte i pranishëm në ceremoninë e Academy Awards të vitit 2026, ku fitoi çmimin për aktorin më të mirë në rol dytësor, pasi ndodhej në Ukrainë.
Misteri për mungesën e tij në ceremoninë që u zhvillua në Dolby Theatre në Los Anxhelos u sqarua të hënën, kur presidenti ukrainas Volodymyr Zelenskyy publikoi një foto nga takimi i tyre në Kiev.
Presidenti ukrainas Volodymyr Zelenskyy e falënderoi aktorin për mbështetjen e tij, duke shkruar:
“Sean, falë teje ne e dimë se çfarë është një mik i vërtetë i Ukrainës. Ti ke qëndruar pranë Ukrainës që nga dita e parë e luftës në shkallë të plotë. Kjo vazhdon të jetë e vërtetë edhe sot. Dhe ne e dimë se do të vazhdosh të qëndrosh me vendin dhe popullin tonë.”
Mungesa e Penn nuk ishte krejtësisht surprizë për ata që ndiqnin zhvillimet para ceremonisë, pasi gjatë javës para ndarjes së çmimeve kishte pasur spekulime nëse ai do të merrte pjesë.
Kur emri i tij u shpall fitues në skenë nga fituesi i vitit të kaluar, Kieran Culkin, aktori i tha audiencës:
“Sean Penn nuk mund të jetë këtu sonte – ose nuk donte të ishte – ndaj unë do ta pranoj çmimin në emër të tij.”
Penn ka qenë prej kohësh një mbështetës i Ukrainës dhe ka vizituar disa herë vendin që nga fillimi i luftës me Rusinë.