‘Shpërthen’ Melinda Gates: “Epstein” rikthen kujtimet e dhimbshme të martesës me Bill Gates

Filantropistja miliardere Melinda French Gates ka thënë se përfshirja e ish-bashkëshortit të saj, Bill Gates, në dokumente të reja lidhur me abuzuesin seksual Jeffrey Epstein, i riktheu “kujtime shumë të dhimbshme” nga martesa e tyre.

Në një intervistë për podcastin e NPR, ajo shtoi se çdo pyetje e mbetur në këto dokumente duhet të përgjigjet nga personat e përmendur, përfshirë ish-bashkëshortin e saj. “Jam shumë e lumtur që jam larg të gjitha këtyre baltave”, tha Melinda, ndërsa çifti u divorcua në vitin 2021.

Dokumentet e publikuara nga Departamenti i Drejtësisë së SHBA-së përfshijnë pretendime të Epstein për Gates, përfshirë edhe një sëmundje seksualisht të transmetueshme, të cilat zëdhënësi i Gates i ka quajtur “absolutisht të pabesueshme”. Bill Gates nuk është akuzuar nga asnjë viktimë e Epstein, dhe përfshirja e emrit të tij në dosje nuk nënkupton asnjë veprim penal.

Gates ka deklaruar se takimet me Epstein ishin vetëm disa darka dhe se nuk ka vizituar ishullin e tij. “Çdo minutë që kam kaluar me të e pendohem dhe kërkoj falje që e kam bërë atë”, tha Gates në një intervistë.

Dokumentet përmbajnë më shumë se tre milionë email-e, dokumente dhe foto që tregojnë rrjetin e gjerë të Epstein, përfshirë figura të famshme, drejtues biznesesh dhe liderë botërorë. Epstein vdiq në burg në New York në vitin 2019, ndërsa priste gjykimin për trafikim seksual.