Shpërthim në portin e Roterdamit, një i vdekur dhe gjashtë të plagosur

Një shpërthim i fuqishëm ka ndodhur të enjten në një objekt energjetik në portin e Roterdamit, në Holandë, duke shkaktuar një viktimë dhe plagosjen e gjashtë personave.

Shpërthimi ndodhi gjatë punimeve të mirëmbajtjes në një prej rezervuarëve të magazinimit të produkteve të naftës në pronësi të kompanisë së tregtimit të energjisë Gunvor.

Një zëdhënës i kompanisë konfirmoi se bëhej fjalë për një incident të ndodhur gjatë punimeve, ndërsa autoritetet holandeze kanë nisur hetimet për të përcaktuar shkaqet e sakta.

Policia bëri të ditur se në fazat e para të hetimit nuk kishte shenja që incidenti të lidhej me sabotim. Megjithatë, të gjitha skenarët mbeten nën hetim.

Porti i Roterdamit është porti më i madh në Evropë dhe një prej qendrave kryesore të kontinentit për importin, magazinimin dhe përpunimin e naftës dhe produkteve energjetike.

Pas shpërthimit, autoritetet dhe kompanitë që operojnë në zonë kanë verifikuar gjendjen e objekteve përreth. Edhe terminalet e gazit të lëngshëm natyror (LNG) nuk u prekën drejtpërdrejt nga shpërthimi, sipas autoriteteve të portit.

Hetimet vijojnë për të përcaktuar rrethanat dhe shkakun e shpërthimit, ndërsa autoritetet po monitorojnë situatën në një prej zonave më të rëndësishme energjetike të Evropës.

/rtsh.al/