Shqipëria, fitore e vuajtur përballë San Marinos. Dy gola nga Asllani dhe vendi i parë në grup

Shqipëria, fitore e vuajtur përballë San Marinos në “Air Albania”, 2-1 në ndeshjen e katërt të Ligës së Kombeve(Liga C, Grupi1). Megjithatë, është një fitore që na jep vendin e parë në grup.

Në pjesën e parë kuqezinjtë u treguan mjaft kërkues, duke krijuar shumë raste shënimi, por vetëm në njërin prej tyre arritën të gjejnë rrugën e rrjetës. Në minutën e 11-të ishte Asllani që zhbllokoi sfidën me një gjuajtje nga distanca.

Pjesa e dytë kishte një ritëm të ngadaltë, duke i dhënë mundësinë San Marinos të bëjë lojën e saj dhe të gjejë rrugën e rrjetës në minutën e 66-të me anë të Lazzarit.

Përpjekje dëshpëruese të kuqezinjve në minutat në vazhdim, në fund u shpërblyen me një 11-metërsh që u kthye në gol nga Asllani, 2-1.

Me këtë fitore kuqezinjtë mbajnë vendin e parë në grup me 9 pikë, ndjekur nga Bjellorusia e Finlanda me nga 7 pikë dhe në fund San Marino me 0 pikë.

SHQIPËRI-SAN MARINO 2-1

Shënues: Asllani 11’, 90’+3/Lazzari 66′

Mbyllet sfida, Shqipëria mund San Marinon me rezultatin 2-1.

90’ +3 – Gooooool! Shqipëria përsëri në avantazh përballë San Marinos, Asllani ka kthyer në gol një 11-metërsh.

90’ – Asllani godet bukur, por portieri i San Marinos bën mrekullinë duke evituar rrezikun.

87’ – Manaj e Daku pengojnë njëri tjetrin në zonën e San Marinos, një tjetër mundësi e humbur për kuqezinjtë.

78’ – Hysaj shërben bukur për Manajn, por sulmuesi kuqezi nuk koordinohet si duhet duke goditur në mënyrë të gabuar.

66’ – San Marino surprizën kuqezinjtë, Lazzari ka mposhtur portierin Dajsinani duke vendosur barazpeshën.

60’ – Uzuni tenton me një gjuajtje me kokë pas topit të dhënë nga Hysaj, por përfundon mbi traversë.

49’ – Mehmeti, i aktivizuar në vend të Muçit në fillim të pjesës së dytë, tenton me kokë portën e San Marinos, por goditja e tij është e lehtë, pritet pa problem nga Colombo.

Pjesa e dytë…

Mbyllet pjesa e parë në “Air Albania”, Shqipëria në avantazh 1-0 përballë San Marinos me golin e shënuar nga Asllani në minutën e 11-të.

45’ – San Marino rrezikon portën kuqezi. Della Balda godet fuqishëm, por Dajsinani është pozicional.

37’ – Një tjetër mundësi për Manajn, Colombo ka ndalur me këmbë goditjen e sulmuesit kuqezi.

34’ – Hoxha tenton në hyrje të zonës, por goditja e tij është mjaft e lehtë për portierin Colombo.

27’ – Mundësi për San Marinon që shfaqet para portës kuqezi, por Dajsinani tregohet i gatshëm për të pritur topin e goditur nga Capicchioni.

26’ – Një aksion i bukur nga e djathta e sulmit, me Manajn që ndalet nga shtylla.

11’ – Goooool! Asllani shkarkon të djathtën e tij nga një distancë e konsiderueshme, portieri i San Marinos nuk ka se çfarë të bëjë, 1-0.

8’ – Sulme të shumta të kuqezinjve, është radha e Manajt që të provojë, por goditja e tij është qëndrore, ndalet pa problem nga portieri i San Marinos.

7’ – Mundësi për Muçin, por goditja e tij përfundon larg kuadratit të portës

5’ – Asllani në një pozicion mjaft të favorshëm ka goditur me kokë, por pa arritur të gjejë kuadratin.

3’ – Një moment hezitimi i mbrojtjes kuqezi u dha mundësinë lojtarëve të San Marinos të rrezikojnë portën e mbrojtur nga Dajsinani. Ishte pikërisht portieri që ndërlikoi gjithçka, por në fund arriti të largojë rrezikun.

Ka nisur sfida mes kuqezinjve dhe San Marinos në “Air Albania”…