Sinner nuk ka rivalë, tenisti italian fiton për herë të dytë

Jannik Sinner është thjesht i pandalshëm. 23-vjeçari e tregoi forcën e tij në arenën “Rod Laver” ku fitoi Australian Open për të dytën herë radhazi.

Italiani mundi gjermanin Alexander Zverev me rezultatin e pastër 3-0 (6-3 7-6 6-3), duke u konfirmuar kështu si i paarritshëm në renditjen e ATP-së, por mbi të gjitha duke u bërë italiani i parë që fiton tre Grand Slam në karrierën e tij.

Nuk ka histori finalja e këtij edicioni të Australian Open, që dominohet totalisht nga Sinner, që triumfon për herë të dytë radhazi në tokën australiane dhe nis vitin 2025 me një Slam të fituar.