Smotrich zbulon negociatat me amerikanët mbi “Eldorado Gaza”, BE-ja lëviz drejt sanksioneve ndaj Izraelit

Ministri izraelit i Financave, Bezalel Smotrich, e ka cilësuar Rripin e Gazës si një “Eldorado të pasurive të patundshme”, duke sugjeruar se rindërtimi pas luftës mund të jetë një investim fitimprurës. Ai zbuloi se ka nisur negociata me palën amerikane për këtë çështje, duke e përshkruar si një “plan biznesi” ambicioz.

Nga ana tjetër, Përfaqësuesja e Lartë e BE-së, Kaja Kallas, nënvizoi se operacioni në Gaza përfaqëson një përshkallëzim të luftës dhe se BE po propozon një paketë sanksionesh me qëllim përmirësimin e situatës, duke mos synuar ndëshkimin e Izraelit. Kjo paketë, e cila kërkon miratim unanim, përfshin masa ndaj anëtarëve të Hamasit dhe kolonëve të dhunshëm, si dhe masa tregtare.

Këshilli Evropian ka pezulluar mbështetjen dypalëshe për qeverinë izraelite, një vendim që Komisionerja Dubravka Suica e cilësoi si një “sinjal të rëndësishëm që konfirmon politikën tonë të promovimit të paqes”. Kjo masë, që vjen mes shqetësimeve në rritje për situatën humanitare në Gaza, përfshin pezullimin e fondeve të planifikuara për periudhën 2020-2024, ku 9.4 milionë euro mbeten ende të pakontraktuara.

Ndërkohë, Presidentja e Komisionit të BE-së, Ursula von der Leyen, theksoi nevojën urgjente për një armëpushim, qasje të pakufizuar për ndihmën humanitare dhe lirimin e pengjeve, duke riafirmuar mbështetjen e fortë të BE-së për zgjidhjen me dy shtete.

Nga ana tjetër, Ministri i Jashtëm izraelit, Gideon Sa’ar, e quajti rekomandimin e Komisionit të BE-së “të shtrembëruar moralisht dhe politikisht”, duke paralajmëruar se çdo masë kundër Izraelit do të marrë një “përgjigje të përshtatshme” dhe se veprimet e tilla do të dëmtonin interesat e Evropës.

Burime të Bashkimit Evropian raportojnë se një propozim i ri që është në shqyrtim do të ndikojë në 37% të tregtisë mes BE-së dhe Izraelit. Ky propozim synon të pezullojë një pjesë thelbësore të marrëveshjes preferenciale tregtare, duke prekur rreth 227 milionë euro në vit. Kjo do të rezultojë në tarifa më të larta për importuesit evropianë, veçanërisht për produktet bujqësore.

Në total, BE-ja importoi mallra nga Izraeli me vlerë 16 miliardë euro gjatë vitit 2024. Pjesa tjetër e tregtisë, e rregulluar nga marrëveshjet e Organizatës Botërore të Tregtisë (OBT), nuk do të preket nga këto masa.

Megjithatë, sektori i armëve duket se nuk do të ndikohet nga këto sanksione. Sipas një zyrtari të lartë evropian, importet e armëve nuk mbulohen nga dispozitat specifike të Marrëveshjes së Asociimit BE-Izrael, por nga kuadri i përgjithshëm i OBT-së. Kjo, së bashku me “klauzolën e konfidencialitetit” që shpesh zbatohet për armatimet, bën të vështirë përcaktimin e saktë të ndikimit të plotë në tregtinë e përgjithshme mes dy palëve.

Megjithë pezullimin e mbështetjes dypalëshe, BE-ja do të vazhdojë të ofrojë fonde për masat kundër antisemitizmit, për shoqërinë civile dhe për iniciativat e ndërtimit të paqes nga shoqëria civile izraelite dhe palestineze, si dhe të mbetet donatori më i madh i ndihmës humanitare.

/rtsh.al/